Gauhati HC-i CBI dang Dimapur tatalokba bushisüngdangtsü tuyur

Guwahati, Sept. 7 (Agencies) : Taküm March 5 nü nisung telok kati Dimapur Central Jail nungpoka tur tashiyim agi tetsür raksatsüba atema tai tonglokja alir ka atsüka tepsetba sülen March 19 nü Nagaland sorkari CBI nem bushisüngdang südaktsütsü indang tebilemba metetdaktsü.
Iba lendong atalokba sülen ita trok shi arur Hombarnü (September 7) Gauhati High Court-i CBI dang iba tatalokba bushisüngdangtsü atema tetuyuba agütsüogo.
Hombarnü Chief Justice (acting) K Sreedhar Rao aser Justice PK Saikia nati iba tatalokba dak sendakba ken o ka benoka angadangba sülen CBI dang bushisüngdang asütsü tetuyuba agütsü aser iba osangji ita trok tsüngda agütsütsü tuyuogo, ta tasür kibong atema okatsür Bhaskar Dev Konwar-i osangbener dang ashi.
Iba tatalokba nung tepsetsangji Karimganj, Assam nungi Syed Sarif Khan liasü aser pa ya Dimapur nung gari tejentem yokyayokjiba mapa inyaker ka liasü.
Guwahati nung senso Rajeeb Kalita-i okadak PIL ka nung iba tatalokba ya CBI nem bushisüngdang südaktsütsü atema takhangba agütsü.
Iba tatalokba sülen police-i mezüng osang agütsüba nung ashiba agi, nisung telok rongnungji tetsürtem timba tejaklen liasü aser iba jagi parnoki telok azüoktsü atema tashi bendanga mamshitet.
Nagaland sorkari iba dak sendakba nung affidavit ka agütsüogo. Sorkari High Court dang ashiba agi, police den ken o asem benoka lir, bushisüngdangtsü atema SIT ka tentet, nisung 58 apu aser ano nisung 32 aputsü bushir.