Gauhati HC-i taila kahtepba kuli meshi

Guwahati, March 1 (Agencies): Gauhati high court-i Hombarnü Centre, state sorkar, state police aser Eastern Command Army dang, Kokrajhar district nung yaküm December ita sepaitemi telungpur mita aoba mapang Ratan Narzary kahsetba ken o nung telangzüba agütsütsü asoshi metetdaktsü.
Narzary’er kinungertemi iba dak sendakba ken o nung CBI-i bushisüngdangtsü asoshi akhang. Sepaitemi Narzary NDFB (S) telungpur rongnung züngsem ka ta ser kahset, saka par kinungertemi ashiba agi, pa kecha telungpur rongnung züngsema mali aser pa kecha tai mali, sepaitemi nokdakba kuliji tiyazü ta shisem.
Bodo telungpur temai adoker alisang Jaikhlong Brahma-i pa Christmas atema shishia alidang anir ao, aser tasüngnep pa Laopani tesem nung, NDFB (S) pur atema prangpong shibelener ka ta tai tonglokja kahset, ta Narzary’er kinungertemi ashi.
Pa tenu Anil Narzary-i ashiba agi, tanur asem tebu teti Ratan kecha telungpurtem dena densema maliasü. “Pa telungpur ka asünungbo kechiba police aser Army temi mapu, pa kidang dang liasü,” ta Anil-i ashi.
Narzary’er kinunger tenüng nung okatsür Bijon Mahajan-i ashiba agi, court-i iba keno kechiba CBI nem bushisüngdang mesüdaktsütsüla, iba kuli hopta pezü nung agütsütsü asoshi tetuyuba agütsüogo.
“Iba mapa nung police aser Army nati külemi agi, anungji par kinungertemi CBI mesüra temaba okadak kati iba ken o agizüka bushisüngdang südaktsünüa akhanger,” ta Mahajan-i ashi.
Iba dak sendakba nung kulitem ajak rizünga ayutsü asoshi okadak nungi police nem tetuyuba agütsü.
Taoba mapang Kokrajhar Police-i osangbenertem dang Ratan NDFB (S) telungpur asem den külemi Laopani tesem nung atsüka lia tepset. Telungpurtemi akahba sülen parnoki meyipa akah ta police-isa ashi. AK-56 prangpong aser injang Ratan ket nung lia apu ta police osang ajanga metetdaktsü.
Ratan kahsetba sülen nüburtemi aitsüa nokdakba ajanga chief minister Sarbananda Sonowal iba ken o bushisüngdangtsü nangzük.