Gauri tepsetba atema BJP aser Congress na tsüngda aitsüteper

New Delhi, September 09 (Agencies): Tawa Karnataka kübok Bengaluru yimti nung mejangjaba nisung kari journalist, Gauri Lankesh khasetba dak sendakba nung social media nung telok balala tsüngda aitsütepba mapang ka nung Union Minister, Ravi Shankar Prasad-i Karnataka nung Congress sorkari la nem security magütsüba atema aitsü.
Gauri Lankesh adianu, Indrajit Lankesh-i jembiba o osangkakettem nung adokba nung ajemdaker, Gauri-i Maoists telungpurtem temai adokba atema teyari agütsüba atema inyaka aru, ta shia Prasad-i, kechiba Siddaramaiah-i aniba Congress sorkari la nem security peria magütsü?, ta asüngdang.
“Indrajit Lankesh-i yimjak nung, pa aianui (Gauri) Maoists tem temai adoktsü atema inyak ta ashi. Süra lai iba mapaji state sorkar dang nungi temelaba agir inyak asü? Iba den külemi kechiba la nem security peria magütsü?” ta Prasad-i asüngdang.
Osangkaket nungjisa, Maoist-i Gauri Lankesh dang mepelai liasü ta shia lir. “Karnataka nung Congress sorkari kechiba security magütsütet?” ta BJP lenirisa asüngdang.
Bengaluru nung Gauri khasetba sülen Congress tatong Tir, Rahul Gandhi-i jembiba o dak sendakba nung Prasad-i, kechiba pai (Rahul) state nung par sorkar dang iba indangji masüngdang, ta ashi.
Gauri tepsetba atema Rahul Gandhi-i RSS den sendaktepa aliba teloktem aitsüogo, ta Prasad-isa ashi.
Prasad-i, Gauri tepsetba atema aitsür liberal nisungtemi kechiba Karnataka aser Kerala nung RSS nung inyakertem tepsetba atemabo ola madoker, ta ashi.
“Kü medemer liberal nisungtemi journalist ka tepsetba atema o kanga tsüngro songa jembir, saka kechiba Karnataka aser Kerala nung RSS aser BJP nung inyakertem tepsetba mapang nungbo parnoki ola madoker,” ta paisa aitsü.