GB Hospital intern tem longkak ait

Agartala, June 28 (Agencies): Agartala, GB Hospital nung intern parnok 100 shi-i parnok ‘lump-sum’ tangutsü tim ita 4 tashi magütsüba atema tanü iba ya khanga longkak aitba sentong ka tenzüka mapa inyak anenogo.
State nung government medical college iba kicha ya lir aser idakji inyaker kati ashiba agi, iba institution nung specialists, resident aser tanga paramedical staff tem dena mapa inyaker parnok 250 shi lir aser iba den külemi interns parnok 100 shi dena duty station ajak nung staff tem den külemi melentepa tanen makai inyakdar.
Agartala Government Medical College (AGMC) nung kaketshirtem theory küm pezü ser tesadang azüngba sülen curriculum nung shilem ka ama internship küm ka agitsü nüngdaker.
“Onoki mapang telatet ka makai ward ajak nung mapa meinyak tenzükogo,” ta inter kati ashi.
Inter yagisa ashiba agi, iba amala tatalokba ya BG hospital nung tasen masü. “Küm shia ketdangsertemi intern tem ‘lump-sum’ ita 4-5 magütsüi soita ayur aser kaketshirtemi tashi mangai longkak aitba amala sentong ayongzüka akaba sülen ang parnoki agütsür. Kechi amala maparen kati tarutsü doctor tem ozüng alema inyaktsü ajungshir?” ta intern yagi asüngdang.
Inter tanga kati ashiba agi, parnok tata mapang dak alaka mapang talila inyaker kechiyong iba ya state nung tongtibangtiba referral hospital lir aser mapa aika adokba ajanga duty mapang atsülangstüsa akümer.
“GB Hospital nung intern tem taküm March ita nungi tenzüka inyaka arudar aser parnok nem parnok mapa atema ita shia ‘lump-sum’ sen 18,000 agütsür. Ita asem tashi lump-sum magütsüi aruba ya tera tali lir,” ta health department nung ketdangser kati ashi. Paisa ashiba agi, sen magütsüi bangdaka ayuba ya GB Hospital nung clerical staff temi aibelenba lir.
Medical Superintendent, GB Hospital Dr. Subrata Baidya tang station nung mali ta angazükogo, saka Medical Super in-charge-i intern tem dang parnok tangutsü tim lump-sum ghonda 48 tsüngda nung agütsütsü ta nangzükogo.
GB Hospital nung department 22 lir aser item ajak nung intern tem anogoshia amshir.