GB temi PM Modi dang Naga yimten latettsü ayongzüker

Dimapur, March 9 (TYO): Hombarnü Nagaland Gaon Bura Federation (NGBF)-i Nagaland nung sub Division ana dena district headquarters ajak nung peace rally ka ayongzüka agiogo.
March 4, 2020 nü Circuit House, Dimapur nung NGBF-i district ajak nung ketdangpurtem den rongdak senden ka amendang iba sentong agitsü telemtetba agia liasü.
Iba senden nung NGBF-i India sorkar dang parnoki Naga nunger dang nangzükba ajak mapa küma inyaktsü atema tayongzükba agütsütsü lemtet.
Tanü Dimapur nung kin balala nungi nisung aika DC court junction nung adenshia peace rally nung aden. Sentong nung kaketshirtem dena nisungtemi placards amer shilem agi.
“Mr. Interlocutor, ajak jembiogo aser tembangogo, kodang o ji mapa akümtsü?”, “Ajaki agizüktsüsa aser akhümtsübusa Indo-Naga yimten latetang”, “Naga lanu pututem mashioktsütsü merangang”, “India sorkar, nenoki kobika onoki aremzüka aruba tendangtsü?” ta tanü sentong nung adenertemi tezülubatem amer shilem agi.
Sentong agiba sülen Dimapur District GB Association aser Naga Council Dimapur-i Dimapur Deputy Commissioner nem Prime minister Narendra Modi dangi shidi züluba agütsü.
“Naga yimjung olemtep mapang atsülangtsü tatemtsü kecha mali. Ajaki agizüktettsüsa aser akhümketa yimten telemtetba ka agitsü Naga nunger imlaa atar. Küm 70 tema rarayonga aruba sülen yimjung nung liyonga aotsü atema onok renema lir,” ta NGBF-i PM Modi dangi züluba shidi nung shia lir.
“Olemtep nung adenertemi onok dang, Naga tesemtem atema ketdangsübaren tasenba kübok mangatettep aliba onüktem tarutsü nung timi angatettepa aotsü shiogo” ta parnokisa ashi.
“Kechi jembia mulungtepogo, iba nung onük tasen mebenoktsüla mesüra o memelenshitsüla. October 31, 2019 nü züluoka aliba ama, nai osang tajung Naga nunger aser alima dang sangoktsütsü ayongzüker” ta NGBF-isa Prime Minister Modi dang ashi.
“Indo-Naga yimten latetba ajanga, na alima nung democracy tulutiba nung lennir ta asüba tenüng tali ajungkettsü” ta parnokisa ashi.
Nagaland GB Federation Tir, Shalem Konyak-i ashiba agi “tanü agiba sentong ya Naga yimten tebilemtsü atema telemtetba agitsü asoshi mapang atsülangba atema lir. India sorkari Indo-Naga yimten telemtetba agitsü menur, aser kasa mapang nung Naga nunger melongjemba ajanga iba khuret ajurur.”
“Naga nungeri joko ojang dang aremzüktsü, onoki tanga yimten latetdaktsünür” ta Naga Council Dimapur (NCD) Tir, T Bangerloba-ia ashi.
Naga Women Hoho Dimapur (NWHD) Tir Sungsabeni Jamio-ia “Naga nunger mapang talangka timtemogo aser onoki ozü lima nung teti atema yimjung lidaktsünür. Onoki Naga nung ajak yimjung nung alitsü atema tatembang telemtetba ka aginür” ta metetdaktsü.
Dimapur nung agiba sentong nung Nagaland Legislative Assembly taoba Speaker Z Lohe aser Western Sumi Hoho Dimapur tir Dr. Kakheto Zhimomi natia o jembi.
Kohima nung kasa sentong ka TT Stadium nung ayongzüka agi aser iba nung Kohima kübok yimtsüng ajak nungi GB tem den kin teloktem, Civil societies aser kaketshirtem aden.
Sentong nung NGBF General secretary Shikutu Zalipu-i ashiba agi “Iba tebilemtsü ya jala-jabaso nunger nem mebenloktsünüba agi Gaon Bura temi tekaraba nung yimten latetang ta ashitsü telemtetba agi.”
Iba sentong nung Kohima Lotha Hoho tir Pankathung, Sumi Hoho Kohima tir Khevito T. Shohe, Convener Mediation Committee Vesonü Veyie, Pochury Hoho Kohima tir Atathu aser Member media committee Vimedo Hibo nungertemi tayongzükba o tem jembia liasü.
Sentong agiba sülen NGBF aser Kohima District GB Association-i Indoor Stadium nungi Raj Bhavan tashi ao aser Governor R N Ravi nem Prime Minister Narendra Modi dangi züluba shidi agütsü.
Tanüngba district aser sub-division tem nunga GB temi pei pei District Deputy Commissioner aser ADC ket nung shidiji agütsü.