GCC-i IS anema tesashiba raratsü ajungshir: Carter

Riyadh, April 20 (Agencies): Gulf Cooperation Council (GCC)-i Islamic State (IS) ta ajaba kiralongrar telok tetsüti den taoba mapang nungi tesashiba raratsü tajungshiba olen ka US Secretary of Defense, Ashton Carter-i tanü, Bodbar nü metetdaktsüogo.

Saudi Arabia yimtiba, Riyadh kübok Diriyah Palace nung amenba GCC Defense Ministerial senden nung shilem agia o jembidang, Carter-i tanü iba olenji metetdaktsü.

IS telok meshimeshia samatsütsü aser Iran-i Middle East nung tensa mejungi kümdaktsüba maparen nokdangtsü nükjidong nung Carter-i tan Middle East semdangba osang jangjaogo.

IS telok anema raratsüren nung Iraq sorkar den maneni yariteptsü aser IS teloki Iraq nung bener arutsüba tekaraksabaren tanaben yanglushitsü maparen nung Iraq sorkar nungitsü tajungshiba olena Carter-i tanü senden nung lemsatepa liasü.

Ajisüaka, GCC nung densemba linüktemi Iraq Ato Kilonser, Haider al-Abadi-i aniba Iraq sorkar nungita yaritsü atema tanü tashi nungnanga aliba osang bushiteta lir.

Carter-i ajungshiba ama, US-i mapa agi inyaka sayua, par mitkar züngsem 217, Apache helicopter tayimtsütem aser High Mobility Artillery Rocket Systems (HIMARS) Iraq-i yoksemtsü asoshi tan Hombar nü nangzükba den külemi, Iraq mitkartem den yariteper Kurdish peshmerga sepaitem nema teyari sen dollar sen million 415 tashi agütsütsü nangzükogo.

“Iba senden amenba jakdang ozü US-i mapa agi inyaka sayua Iraq nem nungdakba teyari agütsüsemtsü renemogo,” ta Carter-i sangoktsü.

Ano külen, US Tir, Barack Obama-ia tanü Riyadh tonga oa Saudi chuba, King Salman den ajurutepa senden amenba osang angazükogo.

Obama o Salman nati Iran, Yemen aser IS kiralongrar telok den sentakba onük benoka liasü.

Obama-i tan Saudi semdangba ya pai US Tir menden benokba sülen tan agi Saudi pezübenbuba semdanger lir.

Obama-i tanü Saudi lenirtem den ajurutepa senden amenba sülen tang Riyadh nung temendak GCC senden nunga asüng, Brehostibar nü dena shilem agitsü sentong renema lir.

GCC ya Saudi Arabia, Kuwait, United Arab Emirates, Qatar, Bahrain aser Oman nunger densema, Middle East nung tentetba linük 6-i yimtenren aser rongsenren tia tajungba kümdaktsütsü nükjidong nung tentetba tongti tentet ka lir.