GDP mezülongi ainba ajanga sorkar aitsür: Chidambaram

New Delhi, January 08 (Agencies): Honibarnü taoba mapang Union Finance minister aser Congress Party lenir, P Chidambaram-i, Central Statistics Office (CSO)-i GDP mezülongi ainba osang sangdongba ajanga sorkari yazü jembiba jungkai adoktsüogo, ta ashi.
Hokolbarnü CSO-i, 2016-17 küm GDP ainbaji shilem 7.1 shi liasü, aser ibaji iba jakdang küm shilem 7.6 dang ishiba lir. Tesüiba küm asem nung GDP ainba ishitibaji iba ya lir, ta sangdonga liasü.
Iba data ajanga ‘demonetisation’ agi kongshiba indang mashir, ajisüaka rongsenkettsüng mongintemi ashiba agi, November 8 nü sorkari sen 500 aser 1,000 notes anentsüba ajanga taküm küm GDP ainba ishitiba liasü.
Twitter ajanga Chidambaram-i, “Mezüng RBI-i metetdaktsü, aser tang CSO-ia GDP mezülongi ainba metetdaktsür. Sorkari asüküma yazü jembiba jungkai adoktsüogo. Demonisation ajanga ano GDP ajema akumtsü. Shilem 1 reduction tetezü, sen crore 1,50,000 takoksa nguogo,” ta ashi.
Economist aikati taküm küm GDP ji shilem 7 dang tajemba lir ta asadangtetogo aser taoba ita Reserve Bank of India (RBI)-ia GDP ainbaji shilem 7.1 lir ta asadangteta liasü.
Sen tamshidak anentsüba ajanga GDP nung kongshibaji khen atema dang asütsü ta ketdangsertemi imlaa, taruba itatem nung GDP ainba tanaben shilangtsü, ta ashir.