Geeta India-i anir arutsü: MEA

New Delhi, October 15 (Agencies): Küm 10 tejaklen India arrtsü adena aoba sülen Pakistan linük nung alila India tsür tenarong tajak aser temeli tatsük, Geeta kobi melii India-i anir arutsü, ta tanü Ministry of External Affairs Ministry osang ka ajanga metetdaktsüogo.

Brihostibar nü Ministry of External Affairs (MEA) otongdar, Vikas Swarup-i iba osangji jangjatsüogo.

“Noksa (photo) ajanga Geeta-i par tsüraburtem jangjaogo, ajisüaka ano ibaji taliba jangjatsü atema onoki DNA test agitsü,” ta Swarup-i ashi.

Tamalen external affairs minister Sushma Swara-i twitter ajanga, “Kobi melii Geeta India-i arutsü. Onoki lar kibong ngutetogo. DNA test agiba sülen la lar kibong nem agütsütsü,” ta metetdakja liasü.

Osang ajanga ashiba agi, noksatem ajanga Geeta-i la tebu, rabir tetsü aser lar adianutem jangjaogo. Iba noksaji Islamabad nung aliba Indian high commission-i la dangi yoka liasü. Osang ajangasa ashiba agi, lar kibongji Bihar nung lir.