Gehlot aser Pilot napronglai Rajasthan election nung tokteptsü

New Delhi, Yimpoksüi/November 14 (Agencies): Tanü Congress party-i, party general secretary, Ashok Gehlot aser Rajasthan Pradesh Congress Committee (RPCC) Tir, Sachin Pilot napronglai taruba Rajasthan assembly elections nung tokteptsü, ta metetdaktsü.
Tanü New Delhi nung All India Congress Committee (AICC) osangbenertem senden nung Gehlot-i, “Sachin [Pilot] künapronglai taruba assembly elections nung tokteptsü,” ta metetdaktsü.
Ano Sachin Pilot-ia, “Rahul Gandhi tetuyuba aser Ashok Gehlot-i mepishiba nung ajemdaker ni taruba assembly elections nung shilem agitsü atema lemtet,” ta metetdaktsü.
Congress party-i Chief minister candidate tenüng mesangdonger, aser osangbenertemi state nung Chief Minister candidate shiba asütsü ta tanüa asüngdang, ajisüaka Congress-i telangzüba magutsü.
Gehlot-i, “Onoki ya aiben shia aruogo- Rahul Gandhi-i Chief minister shiba shimdir onoki iba nungi ai-aura akatsü. Rajasthan nung Congress-i kodanga election jelia Chief Minister candidate mesangdonger,” ta metetdaktsü.
Sachin Pilot ya tamalen Ato kilonser, Manmohan Singh-i aniba sorkar nung minister inyaka liasü, ajisüaka 2014 küm Lok Sabha election nung Ajmer menden nungi tamakok angu. Taküm küm tetenzüklen iba menden atema by-elections nung pai metoktep saka iba menden nung Congress-i menden aikati takok angu.
Osang angzükba agi, state Congress nung camp ana lir- ka Congress general secretary Ashok Gehlot aser kaji Pilot-i aniba team lir. Aikati tena rongnung ka chief minister candidate asütsü ta bilemer.
Ano külen tanü Bharatiya Janata Party (BJP)-i candidate tem mezüngbuba tarensen sangdonga tenüng 131 sangdongogo, ajisüaka tang tashi Congress-ibo candidate tem tenüng mesangdong.
Tamalen Rajasthan state in-charge Avinash Pande-i candidate tem tenüngji Bodhbarnü sangdongtsü ta metetdakja liasü, ajisüaka menden balala nung obang mapuba ajanga tanüa candidates mesangdong südi.
Rajasthan nung December 7, 2018 nü assembly election agitsü aser December 11 nü vote zünga election osang sangdongtsü.