Gen. (Retd) Khole NSCN-IM nung aden : GPRN/NSCN-i pa züngdoker

Dimapur, March 12 (TYO) : Gen. Retd Kholi-i agütsüba sangdong ka nung pai Naga nunger tarutsü atema bilema chairman Isak Chishi Swu aser general secretary Th. Muivah lenisüba kübok Nationalist Council of Nagalim nung adentsü telemtetba agiogo ta metetdaktsü.
Chairman Isak Chishi Swu aser general secretary Th. Muivah nati aniba NSCN ji Naga nunger tarutsü atema inyakba telok lir aser India sorkar dena alima nung linük aikati agizükba telokji NSCN lir, ta Gen. Retd Kholi-i sangdong nung shia lir.
“Kü mulungsentsü ajanga nübortem mashilen masü saka timlen anitsü atema ajungshir. Anungji ni tatem tashi bendanga agüja Naga nunger atema inyaktsü. Naga nunger ajak dang chairman Isak Chishi Swu aser general secretary Th. Muivah lenisüba kübok Nationalist Council of Nagalim kübok anidaktsü mepishia metetdaktsür” ta Gen. Retd Kholi-isa sangdong nung metetdaktsü.
Ano, MIP, GPRN/NSCN sangdong ka nung GPRN/NSCN president Gen. (Retd) Khole-i national Yezhabo anema NSCN-IM telok nung adenba atema March 12, 2016 nü pa GPRN/NSCN nungi züngdoker ta metetdaktsü.
Deobarnü GPRN/NSCN indang designate Khehoi camp nung National Tatar Hoho (Assembly) rongdak senden ka nung iba telemtetba agi ta sangdong nungsa shia lir.
June 7, 2011 nü Gen. Retd Kholi nem mapa lemzükja liasü aser January 15, 2016 nü pai tezüluba ka nung pa maru tashi Ato Kilonser N Kitovi Zhimomi nem tashi aser tebilemtsü ajak agütsür ta zülua yutsür pa sodi agia liasü.
Pa temang manemba kuli agüja mapa nungi sodi agia liasü saka iba mapangji pabo tangar den tasa tamajung atongerba liasü. Kanga dang tongtipang mapang ka nung pai iba telemtetba agiogo aser pai nübortem aser sorkar matsüngdang tamakok anguba otsüji kodanga mamatsü, ta MIP, GPRN/NSCN sangdong nungsa shia lir.
GPRN/NSCN-i Gen. Khole züngdokba sülen Naga army nung C-n-C, Gen. M.B. Neokpao Konyak NSCN chairman aser GPRN president asütsü tenüng jateta shim, ta sangdong nungsa metetdaktsü.