Gen.(Rtd) Kholi Konyak tadong tir asütsü tenangzükba agi

National Socialist Council of Nagalim (NSCN) nung tadong tir asütsü asoshi Gen.(Rtd) Kholi Konyak tenangzükba agiba noksa nung angur. New Delhi, May 19, 2016. 

Dimapur, May 19 (TYO) : Isak Chishi Swu aser Thungilang Muivah nati aniba NSCN telok nung tadong tir asütsü asoshi shimba sülen tanü Brehostibar nü New Delhi nung NSCN-IM telok mapa inyakdak Gen. (Retd.) Kholi Konyak, National Socialist Council of Nagalim nung Vice Chairman asütsü asoshi tenangzükba agiogo. Pa ya May 17, 2016 nü National Hohoi CHQ Hebron nung NSCN tadong tir asütsü shimteta liasü.
Brehostibar nikongtsütsü 4:00 ako nung Gen. (Retd.) Kholi Konyak NSCN nung tadong tir asütsü tenangzükba agiba sentong nung Rev. A. Puni menden liasü aser tenangzükba agiba maparen ya Steering Committee nung tayonger Wb. Qhevihe Chishi Swu-i ketdangsüa agia liasü. Iba sülen temoatsü meshia Council of Nagalim Churches nung tongti zülur Rev. Shekshim Kasar-i sarasademtsü.
Iba sentong nungsa NSCN tongti zülur, Th. Muivah-i jembidang, Gen (Retd.)Kholi ya Naga yimten otsü nung takok tulu ngua yimten tenzükba lenir ka lir aser iba ama lenir ka nem aküm agüja iba menden ya agütsür ta metetdaktsü. Paisa Gen.(Rtd) Kholii telemtetba shitak agiba asoshi pelaba metetdaktsü.
Pa nem yimten khuret aser maongka agütsüba agizüka jembidang, ” Naga yimten tenzükba nung kü nükjidongji lenir asütsüba masü saka anidaktsü asoshi dang bilema liasü, saka iba ama maongka agütsüba asoshi pelar saka lenmangbo nenoki dang sayua anitsü, ” ta Gen. (Retd) Kholi-isa metetdalktsü.
Iba sentong nung Gen (Retd.) VS. Atem, Wb.Tongmet Wangnao, Wb. KP. Hurray, Wb. Lincoln aser Wb. Pasheto Chishi Swu nungertem dena liasü ta GPRN nung Secretary Wb.S.Among Lim-i sangdong ka ajanga metetdaktsü.