General election 2018 magitsüla: Imkong Imchen

Kohima, October 22 (TYO): Naga yimten tebilemtsü atema telemtetba ka agitsü atema joko mapang tonga arur ama lir aser iba jagi February 2018 nung State General Assembly Election agitsü alibaji magitsüla, ta Health & Family Welfare Minister, Imkong L. Imchen-i ashi.
Telok anaprong tsüngda nendaka aser amalitepa mapa inyakba den telok balalai yaritepba ajanga olemtep joko tatembang kati arur. Yimjung olemtep nung NSCN(IM) dak alia Naga telungpur teloktemi shilem agiba atema kanga pelar, ta paisa ashi.
Tanü nikongdang osangbener den senden ka amendang, Minister Imkong-isa “Naga nungertemi obang meputep alibatem toktsütsüla aser Naga yimten tebilemtsü lemtettsü atema pei tangatetba tajung aser shisatsü agütsütepa yariteptsüla” ta ayongzük.
Aruya aliba State General Election ya magitsüla aser süidaktsütsüla kechiyong iba jagi Centre-i President’s Rule alitsü ozüng agütsütsü atema lenmang lapoktsütsü. Naga yimten tebilemtsü den sendaktepa alirtemi joko Naga nunger ajaki agizüktetba telemtetbaji kechi koma asütsü’ar jangjajangja metetdaktsütsüla, ta paisa ashi.
Naga People’s Convention-i India Linük Temzüng nung Arrla 371(A) nung ajemdaker India sorkar den 16 Point Agreement agitep saka tanü iba onük ya meputep lir kechiyong Centre sorkari mapa timi meinyak, ta Minister Imkong-isa shisem.
“Naga nungeri iba onük ana kanga jembir saka India sorkari item tenangzükba agidang miima mapa küma inyaktsüba lenmangtem shibangtsü” ta paisa metetdaktsü.
16-Point Agreement aser Arrla 371(A) nung yimsüsürtemi sign asü anungji iba onük ana ya Okadaki masü saka yimsüsürtemi dang rasa ashitsüla. Tarutsü nung asenoki sasaa mebilemtsüsa tanü Naga yimten tebilemtsü atema inyakertemi kanga dang kümdanga aser shisa kaa mapa inyaktsüla, ta Imkong-isa ayongzük.
NSCN(IM) aser India sorkar tsüngda sign sütepba tenangzüktepji ozüng amertemi masü saka yimsüsürtemi meyipzüka metetdaktsütsüla aser iba tenangzüktep nunga tesaratem alitsüla, ta paisa ashi.
Iba tangatetba nung ajemdaker State Assembly-i mapang süia moudaktsütsüla aser ajaki nendaknendaka yimten olemtep nung pusema nungittsüla, ta Imkong-isa ayongzük.
“Centre sorkari nendaka mapa inyaker süra aser Naga yimjung olemtep tatemleni arur süra, State Election magidaktsütsüla saka Naga yimten tebilemtsü lemtettsü atema rangloker mapa inyaktsüla” ta paisa ashi.
Nagaland state nung taoba mapang President’s Rule alidang timtemtem ajuruaka kechiba PR alitsü indang tebilemba lemsateper ta osangbenertemi asüngdangdang. “elections agira, loktiliba nung mepetmesü adoktsü. Election nung sen amshitsü aser candidate 60-i takok angutsü aser aikati tamakok angutsü. Election sülen takok anguba MLA 60 aser parnok pusemertemi menden meyutsünütsü. Iba jagi President’s Rule ali nungdang Naga yimten tebilemtsü asoshi tekaraba nung telemtetba ka agitettsüsa mapa inyaktsü akok” ta Minister Imkong-i langzü.