General election jakdang Jakarta nung Islamists aika jaja

Jakarta, Luchii/Dec. 02 (Agencies): Longkak aitba ajanga Jakarta nung Khristan yimsü amanger ex-governor menden nungi aludaktsür küm ana ajungba bilemteta Amungnü Indonesia yimtiba, Jakarta yimdong nung nisung 100,000 shi jaja, kong taruba küm general election agitsü lir.
Muslim nunger timba aliba linük, Indonesia nung tamangba yimsü tsütsü temulung magütsüba tatishitsü ka amai 2016 küm longkak aitba sülen taoba governor, Basuki Tjahaja Purnama ya office nungi vote ajanga agientsü aser tamangba yimsü mezüngmeshiba mechi küm ana tepuokdak ayu.
Indonesia ya alima nung Muslim nunger timtiba aliba linük ka lir, kong kin tilatem dak lendong agütsüba ajanga kin temeyoktep tesunep nung lia aruba naroküm samaa aor.
Amungnü iba ‘peaceful rally’ nung nisung 100,000 shi aden, kong police 23,000-i tanükba agütsü, ta Jakarta police odongtar, Argo Yuwono-i osangbener dang ashi.
Item demonstrator ya aika süoshi temesüng agir Islamic nisan amer National Monument nung adenshi, kong taoba general aser tir menden atema tokteper, Prabowo Subianto-i o jembia liasü.
Luchii/December 2016 nung Purnama menden nungi atsüngdokba rally ya Subianto-i busema liasü aser Amungnü rally agiba ya Rongchii/April nung tir atema election agitsü aliba nung takok angutsü nükjidong yur ayongba südi, ta aikati asadangteta lir.
Pai Indonesia nung tang tir teinyakdak, Joko Widodo den tokteptsü, shibai Muslim nunger putir, Ma’ruf Amin ya tatong tir atema candidate shima lir.
2016 küm agiba rally koba dang “212 demonstration” ta ajar, iba rally ya Widodo-ia busema liasü.