General Manager-i Railway staff nem mapa tajung asoshi sempet agütsü

Maligaon, September 8 (Agencies): Mapa nung kanga temolung agüja takok ngua inyakba atema Altagram, Station Manager, Nand Kishore Sahu aser Alipurduar division, Gateman Totan Saha na nem 07.09.17 nü, N.F Railway, General Manager Chahatey Ram-i tetushi sempet agütsüogo
July 4, 2017 nü mapa inyakdang Altagram, Station Manager, Nand Kishore Sahu-i Down Avadh Assam Express train coach ka nungi mokozü adoka anguba sülen teka ajanga temaitsü agüja train Altagram- Betgara section nung anendaktsü.
Alipurduar division nung Gateman, Totan Saha-i July 11 2017 nü duty nung aliba mapang train no. UP NGC Auto nungi part tem sangzüa aliba metetdakja liasü. Iba sülen train ya anendakja Fakiragram nung Guard aser Points man temi reprangshia liasü.
Iba amala kümkümshia aliba maparen tajung ajanga lendong tulu ataloktsü aliba nungi jenbutsü. Iba ken o nung Sahu aser Saha nati mapang shidak nung mapa shidak inyakba ajanga nisung taküm aser railway pur osettsüt aika kümzükogo.
General Manger-i tena mapa tajung asoshi tena tenüng asangba den külemi, külem inyakertem asoshi nükrangdong ka asütsü asoshi ajungshi.