Geneva nung Syria yimjung senden amentsü ayonger

Geneva, December 10 (Agencies): United States, Russia aser United Nations (UN) nungi lenirtemi Switzerland kübok Geneva nung ajurutepa Syria nung adokba mangatettep agiena yimjung lidaktsütsü senden ka asüng, Hokolbar nü amentsü sentong renemogo.

“Tan Geneva nung senden amendang Syria yimjung den sentakba onüktem benokba den külemi, Islamic State (IS) densema kiralongrar teloktem meshimeshia samatsütsü tasa aser onük balala benoka jembitsü,” ta Russia Deputy Foreign Minister, Gennady Gatilov-ia tanü metetdaktsü.

Küm 4 tejaklen nungi tenzüka Syria Tir, Bashar al-Assad-i aniba sorkar aser sorkar anemer na tsüngda tongpang kanga sashia raraba ajanga nisung 250,000 dak tema tepsetba osang bushiteta lir.

Syria tensa tajungba kümdaktsütsü nükjidong nung mitkar tashi amshia tongpang rarar, US o Russia natia külemi lungjemer inyakba ajanga Syria nung yimji yimjung tia bener arutsütsü alizüng ayuba osang angazükogo.

US-i par mitkar tayimtsü amshia IS telok kanga sashia amakba osang jangjaogo saka Russia mitkar tayimtsütemibo Syria sorkar anemer anema amakba maparen tesashiba inyakba osang bushitet lir.

“US Assistant Secretary of State, Anne Patterson-i aniba US lenirtemia asüng, Hokolbar nü ayongba Geneva senden nung shilem agitsü renema lir,” ta US State Department otongdar, John Kirby-i tanü osang jangjashitsüogo.

Syria nung tongpang raraba telok rong nung yimjung tezüngzüktep agidaktsüba sülen parnoki külemi lungjemer yimtenren tebentettbaren bener arutsü ajungshitsü nükjidong nung tan Geneva nung senden ayonger lir ta pai shisem.

Asüng senden nung UN’er Syria peace ambassador, Staffan de Mistura-ia shilem agitsü sentong renemba osang jangjaogo.