Geology & Mining Dept. ajanga Kiphire nem hand sanitizer agütsü

Dimapur, Rongchii/April 09 (TYO): COVID-19 tashidak wara den raraba nung shilem ka ama Geology & Mining Department ajanga April 9, 2020 nü Dimapur nung aliba Directorate nung sentong tilaka ayongzüka Kiphire district atema hand sanitizer aser sen lakh ka agüja liasü.
Director, Geology & Mining, S. Manen ajanga ashiba agi, taoba mapang nunga department indang lab nung hand sanitizer litre 50 shi yanglua Directorate telung nung amshiba den külemi DC Dimapur aser Treasury office nem agüja liasü.
Minister, Geology & Mining, Kashiho Sangtam teyari ajanga department indang Lab-i World Health Organization (WHO) standard nung aliba ama tang tesüsa hand sanitizer litre 260, aser Kiphire district atema litre 180, Commissioner of Police, Dimapur nem litre 20 asür tanüngba ya Dimapur DC nem amoktsür, ta paisa ashi.
Hand sanitizer Nagaland ajunga peritsüsa Department indang Lab nung yanglutettsü tashi lir, saka iba mozü yangluba nung amshiba alcohol angutsü temela masü, ta Minister Kashiho Sangtam-ia iba sentong nung ashi.
Sentong nung DC, Dimapur, Anoop Khinchi, IAS-ia Department dang pelaba lemsatep aser tarutsü anogotem nunga maneni lungjemer inyaktsü ayongzüka liasü.
Iba sentong nung Minister, Geology & Mining, Kashiho Sangtam, Advisor, School Education, K. Tokugha Sukhalu, DC, Dimapur, Anoop Khinchi, Director, Geology & Mining, S. Manen-i anir official aser police tanishirtem dena liasü.