George HW Bush alanga tekongret raksa

Kennebunkport, July 16 (agencies): United States of America nung Tir inyaker rongnung arishi talangtiba alisang, George HW Bush Bodhbar nü par mei mapang ki nung alanga tekongret raksa saka junga lir, ta par otongdari ashi.

Arishi küm 91 tain, Bush ya Bodhbar nü alangba sülen mozü kidang anepaludar, aser pa kanga koda mesübo masü, ta otongdar Jim McGrath-i ashi.

US nung Tir 41buba inyaksang, Bush ya khen tatsüka asoshi tekong azüoka alepba agi aleper alitsü, ta twitter ajanga lemsatep.

Pa ya dang Maine Medical Center, Portland nung yaridar koba nung tanurtem mozüki ka pa kinüngtsü tenüng nung lapoka lir.

Bush ya tekolok nung timtem tera lir aser ibaji ajanga pa dang wheelchair mesüra talongtsü tanga kar amshiang, ta ashi. Iba den külemi tawa tanü pa temang nung tanga timtema kar ajanga tim atemer.

Yaküm December nunga pa tango junga mesashitetba agi Houston mozükidang hopta ka shi munga liasü. Iba mapang doctor aser nurse temi pa kanga junga anepaluba atema pai kanga pelaba lemsatepa liasü.

2012Khristmas nunga pa aketba aser tanga temang timtem kar atema kasa mozükidang ICU nung munga liasü. Pa ita ana tera majung munger külen January 2013 nungang mozü kidang nungi adok.

Pa 1988 küm Tir maküm dang Ronald Reagan kübok term ana tashi Tatong Tir ka ama inyaka liasü. 1991 küm pa Tir asüba mapang Kuwait den rara tulu akok aser iba sülen par republic teloki Democrate telok makokba ajanga Bill Clinton-i pa melentsüsa aküm.

Republican tebu aser taoba mapang US Tir George W Bush ya World War II mapang tayimtsü tanidak nung Pacific tzüyim nung kahzüka tsükdaktsü. Iba den külemi pa ya US asoshi China ambassador aser CIA director inyaka liasü.

Pai anünglak nungi asemben tashi pungzükdangogo. Pa arishi küm 90 ajungdanga Kennebunkport nung aliba par kidang parachute ka nung alu.

Saka arishi küm 91 ajungdangbo par kinüngertem den ajem-ajema among.

Tsüngküm mapangbo kinüngtsü tena Houston nung dang alir.

Tang Florida nung Angh teinyakdak, par jabaso Jeb Bush, 2016 küm Tir asoshi tokteptsü tebilemba lir.