George HW Bush mozü kidang nungi aluogo

Austin, Texas, Monupii 05 (Agencies) : Taoba US Tir, arishi küm 93 tain George HW Bush shiba hopta ana shi temang anepalua liasü, pa temang tajungba kümer mozü kidang nungi aluogo, ta par otongdari metetdaktsüogo.
Tang tashi arishia aliba taoba US tirtem rongnung tambusang, Bush ya taoba Rongchii 22 nü nungi Houston Methodist Hospital nung anepalua liasü.
Taoba Rongchii 17 nü pa kinüngtsü, Barbara asü aser la asüpila sentong nung adenba sülen anogo ka lir pa mozü kidangi bener ao.
“Pa reprangba doctor-temi ashiba agi, pa temang tajungba kümdar aser pa kidangi oner,” ta otongdar, Jim McGrath-i metetdaktsü.
Bush shiba 1989 nungi 1993 tashi US Tir inyaka liasü, pa küm ka tejaklena aketba atema kasa mozü kidang among aser tesülen pneumonia (mild case) agi kangshir ta putet.
Bush ya Republican telok nungi US Tir anabenren (2001 to 2009) inyaksang George W. Bush aser taoba Florida Governor Jeb Bush shibai 2016 küm Republican telok nungisa ‘presidential nomination’ atema toktep saka takok mengutet, tena tebu lir.