George HW Bush mozüki nung anepalur

Washington, January 18 (Agencies) : Taoba US president George HW Bush tango sashitsü timtem ajuruba atema Honibar nungi mozüki ka nung temang anepaludar, ta par kibong atema otongdar kati metetdaktsü.
Arishi küm 92 tain Bush ya US nung talangtiba taküm aliba Tir lir aser Houston Methodist Hospital nung pa temang tajungba kümogo, ta otongdar Jim McGrath-i sangdong ka nung metetdaktsü.
“Doctor aser teyaritepertem ajak pelar aser pa kobi melii mozüki nungi anizüktsü” ta McGrath-isa shia lir.
George HW Bush ya taoba president George W Bush aser taoba Florida governor Jeb Bush na tebu lir.
US tir Ronald Reagan inyakba mapang Bush-i White House nung kümsük anaben tashi tatong tir inyak aser iba sülen 1988 tir shim. 1992 küm pai Bill Clinton den toktepdang tamakok angu.
World War Two mapang George HW Bush ya naval pilot ka liasü aser pa skydiver ka liasü aser 90 buba tasoba anogomung nung pai helicopter ka nungi pungzüka liasü.
2016 küm Japan-i Pearl Harbor amakba 75 buba anogomung nung Bush-i Texas A&M University nung ayongzüka agiba sentong ka nung aden aser iba mapang pai taoba Kansas Republican senator, Bob Dole nem public service atema sempet ka agütsü.