George Osborne-i parliament menden toktsütsü

London, April 19 (Agencies): Taoba British finance minister George Osborne-i Bodbarnü taküm June ita national election nung pai shilem magitsü ta ashi.
Pai parliament nung madentsü ta ashiba olen ka London Evening Standard newspaper ajanga metetdaktsü.
Osborne ya tarutsü nung prime minister ka akümtsü ta nisungtemi imlaa liasü saka pai finance minister menden toktsütsüsa aküm.
European Union nung UK adentsü atema inyakba mapa nung pai yaritepba atema George Osborne-i finance minister menden yutsütsüsa tensa ajuru.
Pa parliament nung züngsem ka süaka, tanga mapa balala inyakba atema nisungtemi ashishiteper. Pa Evening Standard nung yimozülur ka lir aser BlackRock nunga asset manager inyaker.
“Ni tang atema House of Commons nungi anener, saka asen linük tarutsü aser ni khuret süa bilemba onüktem atema maneni jembitsü” ta Osborne-i shidi züluba nung shia lir.
“Osangkaket nung yimozülur menden nung mener ni maneni ni meimba Britain atema raratsü” ta paisa shisem.