Gerard Pique-i tennis World Cup alitsü atema mapa inyaker

Madrid, May 12 (Agencies): Barcelona Club nungi defence asayar Gerard Pique-i tennis indang World Cup tasen ka asayatsü sentong atonger aser iba nung Andy Murray, Novak Djokovic aser Rafael Nadal nungeria pa pusema nungiter.
Taoba Hombar aser Mongulbar anogotem Pique-i Spain yimtiba nung iba dak sendakba jembishinü atema nisungtem den ajurutepa sendentem amen.
Tennis indang World Cup ji talangba agia anogo 10 tashi alitsü atema sentong lir.
“Iba tebilemba ya kanga tajung aser mapa küma inyaktetra, tennis atema tajangzük tulu asütsü” ta Brihostibar nü Madrid Masters nung tamakok anguba sülen Andy Murray-i osangbener den jembidang ashi.
“Iba ama asayamung ya Tennis-i nüngdaker aser kanga tajung asütsü” ta Murray-isa shisem.
Ajisüaka, iba asayamung ajanga Davis Cup atema khuret talila bentsür arutsü kechiyong Davis Cup ya February, April, September aser November itatem nung anogo asemnü asayaba atema nisungtemi nemnemteper.
Ita aika agia asayaba atema tennis asayar tajungtem aikati Davis Cup nung shilem magii Grand Slams nungang temulung agütsür.
“Küm aika parnok temelenshi kecha melii dang arur. Parnoki mapa apir temelenshi kecha masür mesüra tajungba akümtsü atema mapa meinyaker” ta Rafael Nadal-ia Davis Cup ayonger International Tennis Federation (ITF) indang ashi.
“World Cup tasen ka ayonga asayatsü atema telok nung Pique dena lir aser iba asayamung ya jangratemtsüka asütsü” ta paisa shisem.
Ano külen Novak Djokovic-ia, “iba asayamung ya mapa kümra, kanga tajung asütsü” ta metetdaktsüogo.
“Tennis asayamungtem indang mapangji kanga mazüngi lir saka Gerard ama nisungtemi mapang aser tashi endoka tennis asaya tajungba kümdaktsütsü merangba atema kanga pelar. Iba ya asangsang nung litettsü imlar” ta Djokovic-isa shisem.