Germany aser Chile na semifinal-i iogo

Demirbay-i goal idaktsüba sülen par telok den pelatepdang tangokba noksa nung angur.

June 25, 2017 (Agencies): Confederations Cup Russia nung tang tasayadak lir aser tanü group stage tatembangbuba asaya nung Germany-i Cameroon 3-1 agi koka semifinal-i iogo. Tanga asaya ka nung Chile aser Australia na asayaba nung telok anaproglai goal kaka agüja draw asü, saka Chile pur semifinal-i aitsü asoshi point ka dang nüngdaka liasü, anungji parnoki iba point nguteta semifinal-i iogo.
Chile aser Australia na asaya mezüng shilem nung James Troisi minute 42buba nung goal ka Australia pur atema agütsü, ajisüaka asaya tanabuba shilem nung Chile nung asayar Martin Rodriguez-i goal agüja goal kasa aküm. Telok anapronglai kanga meranga asaya aser goal agütsütsüa maongka ngua liasü saka goal magütsüteti asaya 1-1 nung tembang.
Kasa asayamong nung Germany aser Cameroon na tsüngda asayaba nung asaya mezüng shilem nung telok kati danga goal magütsütet. Asaya shilem tanabuba tenzükli nungi Germany puri kanga kera asaya tenzük aser minute 48buba nung Kerem Demirbay-i mezüngbuba goal agütsü iba sülen ano maneni Germany pur atema Timo Werner goal ka agüja score 2-0 aküm. asaya nung minute 79 or Vincent Aboubacar-i Cameroon pur atema goal ka agüja maneni parnoki kanga meranga toktep saka asaya tatemi Die Mannschaft-i Germany pur atema tasembuba goal agüja score3-1 nung iba asaya tembang.
Germany semifinal nung Mexico den asayatsü aser Chile Portugal den asayatsü.