Germany Chancellor, Merkel & EU lenirtemi Turkey semdanger

Germany Chancellor, Angela Merkel-i semdangtsü asoshi terenemshiba agia, Turkey-Syria arrtsülen, Gaziantep yimti yimdong nung ayuba ‘Refugee nisungtem den ka akümer’ ozülu densemba Merkel noksa ajangdanga Turkey nübur kar jajaba noksa nung angur. (Gaziantep, April 23)

Ankara, April 23 (Agencies): Germany Chancellor, Angela Merkel aser tongti European Union (EU) lenirtemi Turkey linük bushia tanü, Honibar nü ogo.
Tawa EU den agiba migrant nisungtem den sentakba tezüngzüktep mapa küma inyaktsü ajungshitsü nükjidong nung Merkel den külemi, European Council lenisang, Donald Tusk aser European Commission nung Tatong Tir, Frans Timmermans nati tan Turkey semdanger lir.
Parnoki tan Turkey semdangdang Turkey-Syria arrtsülen, Gaziantep nung tentetba refugee jenoka semdanga idakji jenoka alir refugee nisungtem den ajuruteptsü sentong renema lir.
Ozüngi melaba ama jenoka alitsü temelaba magi Greece nung jenoka alir migrant nisungtem Turkey-i yoktsü aser ibaji melena Turkey EU nung züngsemtsü maparen tekaratiba mapang nung inyaktsütsü asoshi Turkey aser EU nati tezüngzüktep agir joko ita ka shi abensaogo.
Ajisüaka, EU-i nangzükba ama, par Turkey  EU nung züngsemtsü aser Turkey nüburtem nem visa mebeni Europe nung senzütsü temeten magütsüra, migrant nisungtem den sentakba tezüngzüktepji tamakok nung tembangtsütsü amokmerenba olen ka Turkey Tir, Recep Tayyip Erdogan-i metetdakja lir.
Ano, Turkey-i nangzükba ama inyakra, Turkey nüburtem nem visa mebeni Europe ajunga nung senzütsütsü temeten agütsütsü onük taruba May ita benoktsü asoshi EU-ia nangzükogo.
Aji oda, dollar sen million 6.7 shi jenjang aketba tezüngzüktepji takok ngua inyakdaktsütsü nükjidong nung Merkel aser UE lenirtemi tan Turkey semdanger lir.
Parnoki Turkey tonga aoba sülen Turkey Ato Kilonser, Ahmet Davutoglu den ajurutepa visa den sentakba tezüngzüktepjia tajungba küma agishitsü onük benoktsü sentong renemba osanga angazükogo.
Ano külen, EU lenirtemi tang Turkey semdangdang idakji jenoka alir refugee nisungtemi ajurushiba timtem toushi aser nüburtem nem agütsüba temeten anema inyakbaren mangur ama metoktsütsü tajungshiba olen ka alima ajunga nung nübur temeten asoshi nokdaker tongti tentet, Amnesty International (AI)-ia metetdaktsüogo.