Germany Chancellor, Merkel-i Berlin nung Ukraine senden jateper

Berlin, October 18 (Agencies): Germany Chancellor, Angela Merkel-i ayonger külen Russia, Ukraine aser France Tir-temi Germany yimtiba, Berlin nung Ukraine den sentakba senden ka tan Bodbar nü amentsü sentong renema lir.
Parnoki Ukraine anüdoklen densemba tesem nung tensa tajungba kümdaktsütsü tasa aser lenmangtem maneni bushitsü nükjidong nung tan senden amentsü sentong renemer lir aser parnoki tan senden amentsü renemba ya taküm, 2016 küm tenzüker tanü tashi nung Ukraine den sentakba senden mezüngbuba amentsü renemer lir.
“Belarus yimtiba, Minsk nung Ukraine sorkar aser sorkar anemer na tsüngda taoba mapang agiba yimjung tezüngzüktep takok ngua agiba mesüra kechi timtem ajanga kasaji takok ngua magitet aser Ukraine anüdoklen tensa tajungba kümdaktsütsü asoshi nungdakba mera agitsü onüktem benoka jembitsü nükjidong nung ozü lenila, Merkel-i Russia Tir, Vladimir Putin; Ukraine Tir, Petro Poroshenko aser France Tir, Francois Hollande nunger Berlin-i jaokogo,” ta Merkel’er otongdar, Steffen Seibert-i tanü osang jangjashitsü.
France aser Germany nati ayonger 2015 küm Minsk tezüngzüktep agiba sülen Ukraine anüdoklen tongpang kanga sashia rarabaren tajemba kümdaktsü saka Ukraine mitkar aser Russia-i pusemba Ukraine sorkar anemertemi tanü tashi mapang shia tongpang raraba osang bushiteta lir.
France yimtiba, Paris nung yaküm, 2015 küm October ita tesüsa senden amenba densema, alima tongti lenir 4-i taoba mapanga Minsk tezüngzüktep takok ngua agidaktsütsü senden ishiben  amenba osanga bushitetogo.