Germany-i Confederations Cup kokogo

Saint Petersburg July 3 (Agencies): Confederations Cup final Deobar nü asayaba nung Germany-i 1-0 agi Chile madak takok nguogo, saka Germany coach Joachim Loew-i ashiba agi, parnok atema tongtibangtibaji sangküm World Cup defend asütsübaji lir.
St Petersburg nung final asaya nung Lars Stindl-i goal agütsüba ajanga Germany puri takok angu. Iba ya parnok asoshi mezüngbuba Confed Cup akokba lir.
Asaya tembangba sülen Germany’s head coach Joachim-i ashiba agi, “Ni iba team dak kanga temolung alemer aser kanga nema adanger. Onok hopta asem ser tesadang dang külemi asayaa liasü, saka onok külemi lungjemer kanga junga asayaoao aser iba takok ya angutsü temsüa lir.”
Loew-i iba asayamong nung shilem agitsü asoshi nungtugu asayar Thomas Mueller, Jerome Boateng, Toni Kroos aser Mesut Ozil nunger meshimi experience kangabo maliba lanur asayartem Russia-i anir ao.
Germany nunger captain Julian Draxler Confed Cup player of the tournament shim aser Timo Werner goal timtiba agütsüsang liasü. Pai asayamong nung goal asem agütsü aser ana assist asü.
German football atema tarutsü nükla kanga tajung lir, kechiyong Under-21 team-ia Hokolbarnü Poland nung Euro championship kokogo.
Ajisüaka head coach Loew-i ashiba agi, lanurtem atema meranga inyaktsü asoshi tang tetenzüker dang lir kechiyong sangküm World Cup nung asayartem rongnung züngoksemnera parnok meranga inyaktsü nüngdaker. Tang tashi nung Confed Cup akokba telok nungi Jonas Hector, Joshua Kimmich aser Julian Draxler nunger dang first-choice starter rongnung densema lir
“Lanurtem tangang tangazükba mapang lir aser parnok timba ka atema iba ya mezüngbuba asayamong lir. Parnoki kanga junga asayaogo saka temaba jenjang nung alitsü asoshi tasak lir aser sangküm onok title defend asütsü asoshi meranga inyaktsü nüngdaker. Asayar lanurtem atema final asaya ya kanga tongtibang liasü. Parnok kangabo experience mali saka parnok ka küma lungjemer temolungtetba tulu nung asayaba sayuogo, koba kanga dang jangratemtsüka liasü,” ta Loew-isa ashi.
Asaya nung Chile nungi asayar Gonzalo Jara-i teketsüla agi Werner tejak nung setoktsüba atema red card machibaji parnok asoshi kanga tia tajung liasü, saka video assistant referee (VAR)-i asadangba sülen pa nem yellow card dang agütsü.
“Ni nokdaka alilen nungi kechi atalokar kanga jangja mangu saka replay bo nguogo aser pa red card achitsü dalang liasü,” ta Loew-isa maneni shisem.