Germany-i Spain madak takok ngua Under 21 Euro kokogo

European Under-21 Championship final nung Germany-i Spain 1-0 agi akokba sülen Germany nunger Captain, Maximilian Arnold-i trophy ajungketer pelatepba noksa nung angur. 

Kraków, July 1 (Agencies): Hokolbarnü southern Polish city, Krakow nung under-21 European Championship final Germany aser Spain na tsüngda asayaba nung Germany pur atema Mitchell Weiser-i goal ka agüja parnoki kokogo.
Under 21 jenjang nung iba takok ya Germany pur atema tanabuba takok lir. Parnoki 2009 küm iba asayamong koka liasü. Kasa mapang nung Spain pur atema iba asayamong pezüben akoktsü aliba maongka aginogo.
Asaya tenzüker minute 40 buba nung ‘Hertha Berlin’ nungi winger Weiser-i, Jeremy Toljan-i cross agütsüba kangajunga tekolak agi tongoktsü. Iba goal ya pa asoshi iba asayamong nung mezüngbuba goal liasü.
“Iba goal ajanga ajak tasak kümdaktsü,” ta Spanish coach Albert Celades-i ashi. Pa ya taoba mapang nung Real Madrid aser Barcelona nungi defensive midfielder ama asayaa liasü.
“Asaya mezüngbuba shilem onok asoshi kanga tongtibang liasü. Asaya tanabuba shilem nung onoki takokba tashi merangdangogo saka mapang meliasü.”
“Auh iba tamakok asoshi onok mepelar kechiyong iba ya final liasü, saka Germany telok ya kanga tajung lir aser parnoki kanga jung asayar,” ta paisa ashi.
Iba asayamong nung Spain puri asaya pezü tashi koker final tongteta liasü aser semifinal nung 3-1 agi Italy akokba telok dang final nunga asaya liasü. Opposing coach Stefan Kuntz atema par telok nungi tongtibang striker Davie Selke yiruba ajanga final masayatet saka defender Niklas Stark maneni team nung anioka asayaa liasü. Germany puri semi-final nung England penalty ajanga koka liasü.
Spain puri asaya kanga jung tenzük saka Germany-i yakda dang asentenshir asaya mezüngbuba shilem parnoki amokbanger asaya.
“Onoki asayar ajaki final nung noklang nung noklang tajungtiba asayatsü imlaa liasü aser ibaji kanga dang shidak liasü. Onoki sentong ka yanglur liasü aser parnoki iba sentong nung kanga junga anidakogo,” ta Kuntz-i ashi.
Asaya tanabuba shilem nung Spain puri temolungtetba tulu nung kanga meranga asaya saka parnoki goal kata magütsüteti asaya tembang.
2015 küm Czech Republic nung asayadang Sweden-i akokba dak alaker iba asayamong ya 2009 nungi tenzüka Germany aser Spain nati dang amokbanger asayar. Spain-i iba asayamong 2011 aser 2013 nung koka lir.