Germany-i tashishitsü aketba ozüng tasen lateter

Berlin, October 21 (Agencies): Germany yimsüsürtemi tashishitsü aketba itangitsü ozüng tasen ka tanü, Hokolbar nü latetogo.
Tan latetba ozüngi par itangitsü tentet, Bundesnachrichtendienst nem Germany linük semdanger bendangertemi tongtepratepbaren aser Frankfurt internet exchange point ajanga bendanglen tongtepratepba osangtsüsang ajunga gitsü temeten agütsür lir.
Kiralongrartemi par Germany mesüra Europe nung lendong atalokdaktsütsü asoshi sentong renemba osangtsüsang mapang jilia lazüktsü nükjidong nung tan ozüng tasenji latettsüsa akümba olen ka Germany sorkari par mapatong metenja metetdaktsüogo.
Ajisüaka, tan ozüng tasenba latetba ajanga Germany nüburtem nungia miim osangtsüsang ajunga nüburtemi memeteti agitettsü ta shia, Germany nung alir aikati tan ozüng tasenbaji anemtsü tenzüka lir.
“Nüburtem nungi osangtsüsang miima agitsüji nübur temeten anema inyaker lir,” ta shia, Greens teloki iba ozüng agientsü onük Germany nung tentetba tematiba okadak aser nungdakra, European Court of Justice nung benoktsü renemba osang ka metetdaktsüogo.