Germany kiralongrar jenokdak tongti kümogo: Erdogan

Ankara, November 03 (Agencies): Germany linük kiralongrar jenokdak tongti kümogo ta shia, Turkey Tir, Tayyip Erdogan-i Germany aitsüba olen ka tanü, Brehostibar nü metetdaktsüogo.
US nung jenoka alir Turkey nunger tamangba yimsü putir, Fethullah Gulen pusemertem maridoki par Germany linük nung jenoka lidaktsüba ken o nung ajemdaker Erdogan-i Germany linük aitsüba olenji sangoktsü.
Turkey mitkar telok kati taküm 2016 küm July ita tamakok ajurua, Turkey linük indang yimsüsütsü tashi tashiyim agi agitsü merang aser Gulen-i ajungmesoba ajanga mitkartemi tashiyim mapatongji inyak ta züngshia, Turkey sorkari Gulen aija, pa par Turkey linüki tanaben anir aotsü takhangba US sorkar dena benoka lir.
Germany linüki Gulen pusemertem jenoka lidaktsüba den Turkey sorkar anema küm 30 dak tema nokdaker, Kurdistan Workers Party (PKK) aser Turkey nung mapang shia lendong atalokdaktsür DHKP-C kiralongrartema par linük jenokdaktsüba aitsüba olen ka pai shisem.
“Turkey sorkar anemer PKK aser DHKP-C züngsemtem kümzüka ayuba den külemi, Germany linüki Gulen-i aniba kiralongrartema kümzüka ayutsü tenzüka lir,” ta Erdogan-i kanga jashia ashi.
Gulen-i ajungmesoba sülen par Turkey nung mepetmesü tia ajuru ta züngshia, Turkey sorkari Gulen pusemer ta temulung melemi bilemer nisung 110,000 dak tema mitkar aser tongti sorkar mapa balala nungi anenja, parnok aika tepuokdaka puoka merenshitsü tenzüka lir.
Ajisüaka, Turkey indang yimsüsütsü tashi tashiyim agi agitsü merangba maparen nung khen yongi shilem magiba olen ka Gulen-ia metetdaktsüogo.