Germany nung gari agi nisung 3 yirutsü

Berlin, February 26 (Agencies) : Heidelberg, Germany nung mejangjatetba nisung kati nisungtem tetsüng agi jajaba lenmangi gari anir tsüoka aiba lendong nung nisung asem yiru, ta osangbenertemi ashi.
“Nisung kati pa gari anir nüburtem tetsüng agi jajaba tesemi tsüoka aidang nisung asem yiru, lendong agütsüsangji yirur pua lir,” ta Honibarnü police-i Twitter ajanga metetdaktsü.
Iba gari anisang ket nungji kotaria ka liasü aser pai nisungtem tetsüng agi jajaba tesem nung gari agi oa atsükba sülen jena ao, ajisüaka pa dak police-i injang agi akha aser pua ayu, ta osangbenertemi ashi.
Pai kechiba iba amaji inyakar ano mejangja, pai aji asaa asü mesüra memeteti inyakar police-ia ano kecha mashi.
December 19, 2016 nüa Anis Amri, ta sür nisung kati Kaiser Wilhelm Memorial Church, Berlin anasa aliba Christmas market nung truck gari ka anir tsüoka ai. Iba lendong nung nisung 12 asü aser nisung 50 dak tema yiru. Iba lendongji Islamic State (IS) telungpuri agütsü ta tenüng agiogo.