Germany nung tayimtsü noklang aika mejaja

Berlin, Rongchii 10 (Agencies) : Frankfurt yimti nung aliba tayimtsü anendak tulutiba densema Germany lima airport tulu pezü nungi jajaba tayimtsü noklang aika shibanga ayu aser ibaji ajanga passenger meyirijang aika timtemogo.
Tayimtsü company nung inyakertem aser public sector worker-temi itasen tujang ta longkak aitba ajanga tang linük nung nüburtem jenti timtem ajurudagi.
Tanü Sangtennü jajatsü sentong renema liasüba tayimtsü 1,600 ronungungi 800 thinena ayur, ta Lufthansa-i metetdaktsü.
Iba denji külemi Frankfurt, Munich, Cologne aser Bremen nung aliba tayimtsü anendak nungi jajaba tayimtsütem shibangba ajanga oliorartem jenti timtemdagi.
Ano Germany lima state balala nung aliba nurseries, rubbish collection services aser swimming pools amala nunga kasa timtem ajuru.
“Mapa agütsürtem nem iba amala sentong ayongzükba ajanga ozü mulung machiba kuli tejangja sayur,” ta Germany nung labour union for service sector employees tulutiba tenüng agi Verdi nung tekolakba, Frank Bsirske-i metetdaktsü.
“Ajaki agizüktettsüsa telemtetba ka dangi arutettsü atema ken o lemtepa jembitsü asoshi jateptsü ta onoki teimla akar.”
Paisa ashiba agi, taruba hopta tashi nung employer-temi parnok mulung chidaktsütsüsa meinyakra ano iba dang nungi tesashiba apusotsü.