Germany: Train ana tsüktep; 9 tsükset, 100 dak tema yiru

Bad Aibling, February 09 (Agencies): Germany kübok Munich nungi southeast tsütsüleni kilometer 60 shi pilar Bavaria kübok tentetba jila, Bad Aibling anasa nübur anir senzükba train ana tanep, Mongolbar anepdang tsüktepa lendong atalokba osang ka Germany police ketdangsertemi metetdaktsüogo.

“Tanü lendong nung nisung 9 tashi tsüksetba aser nisung 108 shi yiruba osang tang tashi nung jangjaogo,” ta parnoki ashi.

“Train anaji tanep 6:48 ako meta tsüktepba osang jangjaogo aser tang yirua alir nisung 108 rong nung parnok 18 tashi taküm tia kanga mejungi lir,” ta parnoki shisem.

“Tanü lendong atalokba atema sasa bilemer. Tan lendongji kechi timtem ajanga atalok iba osang jangjatsü asoshi bushisüngdang tenzükogo,” ta Germany Transport Minister, Alexander Dobrindt-ia lendong atalokdak tsüngdong tonga oa semdangba sülen metetdaktsü.

Tan lendong ajuruba train anaji France nung tentetba nübur tesem balala nung anir senzüba Transdev tentet kübok densemba Meridian teloki ketdang asüba train aliba osanga jangjaogo.

Meridian teloki alima linük 19 nung train, tram aser bus garitem ketdangsüa senzüdaktsür aser par teloki 2014 küm kisüng nung dollar sen 7.4 million shi aazükba osang bushiteta lir.