Germany:Refugee tem dak ozüng alema inyakba tai 3,533 züludena lir

Berlin, February 26 (Agencies) : Germany nung ozüng amshiba ministry nungi ketdangsertemi refugee tem aser linük nung jenoka alirtem dak ozüng alema inyakba tai 3,533 züluodena lir, ta ashi. Item tai ya nisung tain 560 aser tanur 43 dak inyakbatem lir, ta Deobarnü Interior Ministry-i metetdaktsü.
Iba den külemi, ministry-i, yaküm küm refugee tem nungitba melungtet telok tem dak ozüng alema tai 217 tashi inyakogo, ta ashiba osangbenertemi metetdaktsü.
Osang ajanga ashiba agi, iba osang ya opposition party, Die Linke-i asüngdangba agi bendena zülur agütsü.
Sorkar kübok aliba centre tem nung 988 ben tashi ozüng alema inyakba osang lir. 2015 kümbo ozüng alema inyakba tai 1,031 zülua liasü.
“Right-wing inyakyimji linük asoshi lendong ta magizüki lia nisung taküma samatsü akok,” ta Die Linke party atema otongdar Ulla Jelpke-i interview ka nung ashi.
Sorkar-i nüburtem shisatsü nung refugee tem dak lendong keta lir ta jangtsüa lir, ta Jelpke-i ashi.
Ministry-i nguteta aliba osang ka nung 2016 küm Germany-i tejenokdak bushir nisung 280,000 apu. Ibaji 2015 küm dang nungi noklang nung shilem 68 agi tajemba lir. Kanga junga asadangra 2015 küm linük nung jenoktsü asoshi nisung 890,000 arua liasü ta shia lir.
Taküm January ita nunga linük nung jenoktsü asoshi nisung 14,500 Germany-i aitogo.