Germany:WW-II Bomb tem ajanga nisung 50,000 tesem azüngtetdaktsü

Berlin, May 6 (Agencies) : Honibarnü Hannover yimti, Germany nung World War II indang bomb 5 mepokdaktsütsü atema inyakba mapang tesem nung aliba nisung 50,000 shi parnok aliba tesem nungi khen atema atsüngindaktsüogo, ta ketdangsertemi ashi.
Linük nung ibala mesükba mapa tulu inyakbaji tan agi tanabuba lir aser ibai mapa tulu rongnung tanabuba lir. Iba mapa ya ajanga tesem nung aliba nübur 10 sü nungi shilem ka dak kongshi, ta osangbenertemi ashi.
Tang azüngtetba ki nungji care home tenet, clinic ka aser tire plant ka ta lir.
Tanü iba tesem azüngteta yutsür aoertemji kecha lendong melii meyipa arutettsü ketdangsertemi imlar.
Iba ki azüngtetba maparenji anepdang 9:00 ako nungi tenzüka liasü aser nüburtem dang nüngdakba oset aser mozütem bener apusotsü tetuyuba agütsü. Parnok dang ano gas aser electric oset ajunga kanga junga shibanga yur aotsü dena metetdaktsü.
Iba tesem azüngteta yutsür aoertem mapang intoktsü asoshi yimti nung museum, tanurtem film aser saisapong sentong kar lapoktsü.
World War II mapang tsükchirtemi Hannover nung bomb jenti pokloktsü aser iba mapang nisung meyirjang aika asüba den yimti tuluba kalen raksatsü, ta osang ajanga ashi.
WW II sülen Germany nung Bomb dak sendakba nung tesem azüngteta yutsür aoba mapa tulutibaji Augsburg nung yaküm Khristmas mapang liasü.
Augsburg nung kisü mapa inyaka mapang bomb tonne 3.8 ka ngutetba sülen nisung 54,000 tesem azüngteta yutsür oa liasü.