Ghana opposition lenisang, Nana-i Tir election kokogo

Accra, December 09 (Agencies): Ghana nung tentetba tongti opposition telok lenisang, Nana Akufo-Adddo-i Tir election nung takok ngua, Africa continent anülulen tsütsülen tentetba Ghana linük madak yimsü asütsütsü temeten tanü, Hokolbar nü ajangzükogo.
Nana-i Ghana Tir, John Mahama den kanga agi temaba jenjang ngua, tan election nung takok anguba osang jangjaogo.
“Tanü tashi nung vote ajunga tembanga mezüngma lir aser iba yongji, tan election nung bendenba vote ajunga tembanga züngmaba sülen ang ni takok mesüra tamakok anguba osang agizüktsü. Anungji, Electoral Commission (EC) nem par mapa sadema inyaktsü maongka agütsütsü atema asen linük ajunga ajungshir,” ta National Democratic Congress (NDC) yimtenren telok lenisang, Mahama-ia metetdaktsü.
Tashiyim amshia, linük indang yimsüsütsü tashi agizüktsü merangba aser kasa linük nung alir nübur o nübur na tsüngda tongpang kanga sashia raratepa aliba region nung tentetba linük, Ghana nung taoba mapang, 1992 küm nungi tenzüka, raratep aser mangatettep madoki par election sünepa agia aruba osang bushiteta lir.
Maham-i 2013 küm nungi tenzüka, Ghana Tir menden abentsü tenzük saka pa lenisüba kübok par linüki rongsenren jenjang tamajung ajurua liasü.
EC-i tan Bodbar nü agiba election nung takok angur osang yimjak nung sangdongba jakdang Nana-i tan election nung takok anguba osangji Joy FM radio aser Citi FM radio nati tanü sangoktsüba osang jangjaogo aser EC-ia vote ajunga züngmaba sülen tan election nung takok angur osangji yimjak nung tan Honibar nü sangoktsütsü renema lir.
Constituency ajunga, 275 nungi constituency 218 tashi nung bendenba vote azüngba mapang tashi nung Nana-i tan election nung vote noklang nung shilem 53 ngua, vote shilem 45.2 tashi angusang, Mahama den temaba jenjang anguba osang Joy FM radio-i metetdaktsü aser Citi FM telokia constituency 190 nung bendenba vote ajunga azüngba sülen Nana-i vote shilem 54.8 ngua, tan election nung temaba jenjang ngua, Tir tasenba akümtsüsüa jenjang ajangzükba osang sangokja liasü.
New Patriotic Party (NPP) yimtenren telok lenisang, arishi küm 72 tain Nana-i attorney general inyakba sülen 2001 küm nungi tenzüka, NPP teloki aniba Ghana sorkar nung foreign minister menden küm 8 tashi aben.