Ghani-i tongti Parliament menden abentsü asoshi yimsüsür tenüng benoker

Kabul, June 09 (Agencies): Afghanistan Tir, Ashraf Ghani-i Afghanistan parliament nung defence minister aser Intelligence lenisang menden abentsü asoshi yimsüsür tenüng parliament nung yashi, Bodbar nü benokogo.

National Directorate of Security (NDS) lenisang inyaktsü asoshi Masoom Stanekzai aser Defence Ministry lenisang inyaktsü asoshi General Abdullah Khan Habibi na tenüng benokogo aser parliament-i taruba hopta vote bendentsü sentong agia tena agizüktsü mesüra magizüktsü telemtetba agitsü.

Taliban telungpurtemi tashiyim agi pua anir aoba security ketdangser nisung 12 tashi Afghanistan anüdoklen, Ghazni province nung kaseta enokba osang jangjaba sülen Ghani-i par tongti yimsüsür tenüngtemji tan parliament nem agizükdaktsütsü asoshi benoker lir.

Pa tenüng benokba jakdang Stanekzai-i tenüng agi Afghanistan defence minister menden küm 1 shi abenba osang jangjaogo.

Afghanistan defence minister menden bendaktsütsü asoshi Ghani-i Stanekzai 2015 küma shima liasü saka Stanekzai-i iba menden abentsüsa parliament vote peria mongutetba yong pai kasaji abentsü maongka mongutet.

Ano külen, Habibi-ia Afghan Defence Ministry menden taoba May ita tashi abenba osang jangjaogo.

Afghanistan nung tensa kanga mejungi kümaka, Ghani-i aniba naional unity sorkari tapet yimsüsür shima tongti yimsüsütsü menden anaji mebendaktsüba atema Ghani aser pai aniba teloktep sorkar aittsütsü tenzükba mapang ka nung Ghani-i tan yimsüsür ana tenüngji parliament nung benoker lir.

Ano, Afghanistan den sentakba tongti senden ka North Atlantic Treaty Organization (NATO)-i taruba July ita 8-9 nü tashi Warsaw nung amentsü ayongba mapang ka nung Ghani-i aniba sorkari par tongti yimsüsürtem shimtsü maparen tenzüker lir.

2014 küm nungi tenzüka, NATO-i par mitkar telok tuluba ka Afghanistan nungi anitetadokba osanga bushiteta lir.

Ano külen, Ghani-i benokba yimsüsür anaji parliament-ia agizüktsü imlaba olen ka Afghan Second Vice President, Mohammad Sarwar Danish-ia metetdaktsüogo.

“Parliament-i yimsüsür tasen anaji agizükba ajanga dang Warsaw nung amenba NATO senden nung shilem agirtemi tarutsü anogotem nung Afghanistan nem nungdakba mitkar teyari agütsütsü,” ta paisa shisem.