Ghaspani-1, Dimapur nung BJP Booth-level meeting agi

Dimapur, December 21 (TYO): Bharatiya Janata Party (BJP) Nagaland-i ayongzükba Booth-Level workers Training meeting, 4th Ghaspani-1 aser 6th Tening Mandals atema tanü tembangogo, aser taküm küm atemabo ibaji tatembangbuba asütsü, ta Media Cell BJP Nagaland sangdong ka ajanga metetdaktsü.
Nuiland Ghaspani-1 nungi Booth-level workers 364 aser local committee aser Mandal workers densemabo training meeting nung adener 558 liasü.
Iba Meeting ya District president Bendang Ao leniba nung agi, UBC Pastor, Manik Roy-i sarasadem, Mandal President Arsapa Chopi-i lokti pelaa agizük aser state executive member K.Imtiwati Ao-i tepela anküp o jembi. Iba sülen linük naklo ken tena liasü.
Party workers den jembidang, Lhoungu-i, Nagaland nung terenlok department 60 dak tema lir, item department ya nija tajangzük atema masü saka lokti atema lir, ajisüaka tia makai item terenlokji state nung mangur, ta ashi.
Paisa, “tetsürtem, tanurtem, lanurtem, matamabensartem aser yimtsüng nüburtem atema schemes aser programmes aika lir, ajisüaka item jagi nübur ket matonger. State nung BJP sorkar aru nunga temelenshi alitsü,” ta metetdaktsü.
Paisa, Modi leniba kübok BJP-i state nem tesünep aser terenlok agütsütsü, ta ashi.
Naga yimtenren onük dak sendakba nung pai, BJP lenirtemi iba onük atema nendaka inyaker aser tekaraba nung iba onük latettsü aser yimjung alitsü atema inyaker, ta ashi.
BJP ya Hindu Party aser BJP Khristan anemba party lir ta tai tongloktsüba onük nung pai, item ama o ya Nagaland nun gang jembir, ta ashi.
“Central BJP lenirtemi tamangba yimsü nung ajemdaker meinyakler, saka kati ka akhümtsübuteptsü ajungshir, aser Nagaland nung majotity ka ama asenoki Khristan tajung ka ama alitsüla,” ta paisa ashi.
Kasa sentong nung Vizo -i BJP putiotsü aser party inyakyim metetdaktsü.
Tsasepi State Vice President-i BJP Nagaland 2018 visoon document metetdaktsü aser Lima Onen State Secretary-ia jembia liasü.
Tanep State BJP President Visasolie Lhoungu-i Nuiland nung Mandal Ghaspani-1 Office semzükja liasü.
Dimapur district kübok Ghaspani-1 nungi State President, Visasolie Lhoungu, Vice President Tsasepi Sangtam, State Secretary Lima Onen aser BJP Media Cell Convener K.James Vizo nunger liasü aser Peren ditrict kübok Tening Mandal nungi Ananta Mishra Secretary organizing leniba kübok Jaangsillung, General Secretary aser Bandi Spokesman nunger liasü.