GHC, Kohima Bench-i EVM den VVPAT amshitsü tuyur

Dimapur, October 25 (TYO): Gauhati High Court nung Kohima Bench-i Election Commission of India (ECI) dang Electronic Voting Machines (EVM) den Voter Verifiable Paper Audit Trail (VVPAT) amshia 2018 Legislative Assembly Election agitsü tetuyuba agütsüogo, ta Nagaland Pradesh Congress Committee (NPCC)-i metetdaktsü.
Iba ya NPCC-i benokba ken o den putepa lir kechiyong NPCC-i benokba ken o nung VVPAT machines medeni EVMs mamshitsüla ta takhangba agüja lir, ta Media Cell, NPCC sangdong ka nung ashi.
EVMs aser VVPATs külemi amshia Election magitettsüsa süra, EVM melena Ballot Paper System amshitsüla, ta NPCC-i ken o benoka lir.
VVPAT machine ya EVM den sendaktepa lir aser iba ajanga vote agütsür kati candidate shiba nem agütsü’ar kuli angur. Kodang vote agütsür kati EVM nung vote agütsüdir, idangji VVPAT nung shidi ka menüngzüker aser iba nung candidate indang tamaitsü noksa aser tenüng alir.
VVPAT nung second 7 shi ka sayuba sülen ballot shidiji kol nungjisa shisatsü aser drop box ka nung enoktsü, ta Media Cell sangdong nungsa metetdaktsü.