Ghonda 12 Imphal noktangdang nisung 30 shi yiru

Imphal, January 19, 2016 (Agencies) : Mongulbarnü Manipur yimtiba nung ghonda 12 nokdangtsü sentong ayongzükba ajanga nübortem timtem ajuruogo.
Lungkak aitba mapang BJP MLA Khumukcham Joykishan’er Thangmeiband constituency nungi tetsürtem aser tetsür shishilembartem tsüngda mangatettep adoka raratepdang nisung 30 shi yiru.
Teyirurtem rongnung tetsür kabo süchia ao aser Regional Institute of Medical Sciences, Imphal nung anepalutsü atema anir ao saka la temang tajungba kümogo, ta mozüki ketdangsertemi ashi.
Taoba Honibarnü tetsür shishilembar kari BJP MLA ki nungpoka tua lungkak aitba anema Thangmeiband Kendra Development Organisation (THAKDO) ta ser telok kati iba lungkak aitba sentong ayongzüka agir.
Menoknok ajanga raksatsüba market complex tem yanglutsü atema maparen teinyakdak nung BJP MLA kati mapa anendaktsü aser iba mapang pai tetsür dak tim mesüi kongshiba nung ajemdaker tetsür shishilembartemi pa anema lungkak ait. Ajisüaka, ibaji anema ano MLA pusemertemi lungkak aittsü tenzük.
“Onoki Chief Minister Okram Ibobi den ajurutep aser tesem tanga ka nung temporary market yanglutsü atema mepishia liasü” ta THAKDO secretary Heishnam Jamuna-i osangbener dang ashi.
“Ajisüaka Chief minister-i ibaji memulung. Sorkari lenmang anasa market yanglutsü telemtetba agiogo aser ibaji mapang shitak nung yangluzüktsü ta ashi. Iba jagi onoki general strike alitsü telemtetba agi” ta Heishnam-isa ashi.
Tanü Impahl nung dokan, bank, school aser tanga rejutem ajak shibang aser Thangal market tesem nungbo gari ka danga mesenzü.
Iba dak sendakba nung scurity akangshiogo aser sorkari temporary market yangluba mapa manener. Lungkak aiter karibo Imphal jila nung garitem senzüba noktanger.
“Iba ya temporary market dang masü. Ano pologround tezülen ka yanglutsü” ta Works Minister K. Ratankumar-i tanü osangbener dang ashi.