Ghonda 48 tsüngda Kaziranga Park nung kündok asem khaset

Guwahati, November 05 (Agencies): Karbi Anglong telungpur telok nungi temai adoka alirtemi Honibar nikongdang Kaziranga National Park (KNP) nung security sepaitem dang atsüka Park telungi irr kündok tetsü ka den techano ka khaset, aser ibaji densemabo anogo ana tsüngda ozüng alema shikarirtemi iba Park nung kündok asem tashi tepsetogo.
Tenem aser min jenti aliba Karbi Anglong district ya mapang ka nungbo telungpur kanga bulua aliba tesem ka liasü.
Park ketdangsertemi ashiba agi, Hokolbarnü kündok ka khasetba sülen iba park nung security sepaitem aser forces ketdangsertemi iba park junga mita liaka telungpur telok nungi temai adoker nisung 5-6 shi automatic rifles bener Kaziranga National Park telungi miima ai.
Ketdangsertemi ashiba agi, mapang tatsüka tsüngda nung tesem ajaklen nungi injang yoka kündokji khaset, aser ibaji ajanga security sepaitemi kecha meinyaktet.
“Ayaterm atongtsü minute ishika lia parnoki miima shikari, aser minute 15 tsüngda parnoki kündok tetsü den techanuji tepset aser tezü anaji bener jena ao. Parnoki tesem ajaklen injang yokba ajanga security sepaitemi koba tesemlen nungi injang yok’ar mejangja,” ta KNP ketdangser kati ashi.
Osang angazükba agi, kündok anaji National highway 37 nungi tatsüka dang pilar aliba tesem nung akha.
Ozüng alema shikarirtemi teti agia kündok khasettsü atema .303 rifle kanga sapua amshir, iba den külemi tawa ka nungibo parnoki AK 47 aser AK 56 ama automatic prangponga amshir, ajisüaka parnoki ibaji kündok khasettsü atema masü saka forest guards aser security sepaitem anema amshir.