Ghonda 72 tsüngda ken o benoka aliba agientsüla: Jats

New Delhi, March 16 (Agencies): Jat kin-i Haryana sorkar dang, ghonda 72 tsüngda state sorkari lungkak aitertem anema benoka aliba ken otem magienra parnoki maneni lungkak aittsü ta merenogo.
Lungkak aiter Jat temisa school aser college tem shibangtsü metetdaktsüogo.
Jat temi lungkak aitba mapang asürtem nem senotsü teyari agütsütsüla aser Jat nunger reservation anema nokdaksang BJP MP, Raj Kumar Saini nem temerenshi agütsütsüla, ta sorkar nem takhangba agütsü.
Tanü All India Jat Mahasabha tongti lenir, Yashpal Malik-i, “Iba sülen ano kechi mera agitsü’ar March 17 nü lemtettsü. Gari lenmang aser train lenmang mokdangtsü asü kechi koma yimya ka nung lungkak aittsü’ar onoki lemtettsü,” ta ashi.
“Tang tagitak state assembly nung Jats nem reservation agütsütsü atema State sorkari bill ka agizüktsüla,” ta paisa ashi.
State tesem ajaklen nungi Jat lenirtemi, state sorkari parnoki akhangbatem mataloktsüra par nübur ajaki lungkak aittsü lemtetogo, aser tangbo yimtsüngtem nunga lungkak aittsü, ta pai metetdaktsü.
“Tang tashi nung onoki akhangbatem atema telangzüba magütsü. State sorkar atema March 17 tashi anogo latetja lir,” ta Akhil Bhartiya Jat Mahasabha Tir, Hawa Singh Sangwan-i ashi.
Pai ashiba agi, Jat nungeri 2005-06 nungi yimjung nung state 13 nung lungkak aiter, item state rongnung Uttar Pardesh, Uttarakhand, Delhi, Madhya Pardesh, Rajasthan, Punjab aser Haryana densema lir.
Haryana nung yimtenren teloktemi Jat nunger tenüng menüktsüogo ta shia pai, Haryana nung lungkak aitba mapang tatalokbatemji Supreme Court obendanger ka nem bushisüngdaktsütsü atema mepishiogo, ta ashi.
Taoba ita hopta ka shi Jat nunger lungkak aitdang nisung 30 dak tema süogo.