GHS Chuchuyimpang pur school ki tasen ka yangluogo

Mokokchung, August 11 (TYO): Mokokchung Deputy District Education Officer, Wt. Rowainla-i Hokolbarnü Govt. High School Chuchuyimpang pur school ki tasen ka lapoktsüogo; Iba school ki tasenba ya RMSA scheme kübok yangluba lir.
Tanü iba sentong nung tongti tesemdanger Wt. Rowainla-i jembidang, school ka tajung akümtsübaji tesayur aser school tanurtem dak dang masü saka tsürabur aser nübur shilem tulu lir, ta ashi.
Laisa tesayurtem dang inyakdaktsünüba olen ka ashidang, tang dang nungi result tajungba asütsü asoshi ano tera temerangba sayutsü ajungshia liasü. Tesayurtemi aibelenra linük mashileni anir asütsü, anungji aibelen masütsüsa kanga kümdanga tesayuba agütsütsü asoshi laisa ajungshi.
Tanü lokti ajak nung temelenshi nüngdakba indang jembir, anungji, “tesayurtem tama yanglushitsüla aser nenok ajanga tanurtem molungsentsü melenshidaktsütsüla, kodang tanurtem melenshidir alima rangben melenshitsütettsü”, ta lai ashi. “Tesayur dak temelenshi bener arutsü tashi lir” ta laisa shisem.
Aji oda, “tesayurtemi koma meranga aser nendaka sayuaka, tanurtemi temulung magütsüra ajakji amajok dang asütsü, anungji, nenok tedi nungertemi result tajung bener arutsüba amaji parnok dang nungi tajungba asütsü merangtsüla,” ta laisa kaketshirtem ayongzük.
Koba school nung züngdir züngaka, nenok dak dang keta lir, anungji, tarutsü nung nenok ajak senso tajung den asüng lokti lenir kaka akümtsü, laisa ajungshia liasü.
GHS Chuchuyimpang ya 1963 küm tenzük. Iba school ya 2012 küm high school jenjang ajungketer külen class 10 tatidang küm asemben agiba nung, küm shiaji result tajung dang adoka arudar, ta school osang ajanga angazüker.
Tanü iba sentong nung Chuchuyimpang putu yimsüsürtemi anir Chuchuyimpang VEC züngsemtem, SMDC züngsem arua aden. Iba school ki tasenba asoshi Chuchuyimpang Baptist Arogo Pastor, Rev. I. Wati Imsong-i meshiteta sarasademtsü.