GHS Longmisa küm tenem jungogo

Mokokchung DEO, I. Satemmenla-i GHS Longmisa küm 50 ajungba tenüng nung school kima temaitsü zülu ka lapoktsür külen, par külem medemer, Jubilee planning committee aser tesayurtem külemi tangokba noksa nung angur. Longmisa, October 13, 2016.

Longmisa, Oct 13 (TYO): Longmisa Government High School tenzüker küm 50 ajungba Hon Jubilee sentong ka Brihostibarnü Longmisa yimtak Community Hall nung meraketa mongogo.
Tanü iba sentong nung tongti tesemdanger, Mokokchung District Education Officer (DEO), Wt. I. Satemmenla-i jembidang, küm tenem ajungba mapang tamakoktemji meyipa reprangshitsüla, kechiyong meyipa reprangba nungji tarutsü tia nendaka lir, ta metetdaktsü.
“Shir yim nung yimdeni kaket riju tsütsü temulung agütsür, item yim nungji shisaliok maparen tajungba aor, anungji, yimdeni education tsütsü department den teka amteper temulung agüja inyakdaktsünür,” ta laisa inyakdaktsünüba o ka ashi.
Education ajanga dang lokti ka nung temelenshi adoker aser tang asenoki ajuruba lokti temenentemji akoktsü. Anungji, asenoki education tongtibang indangji mamadoki tarutsü nükla tuluba yur inyaktsüla, laisa ayongzüka liasü.
Sentong nung tetushi tejaoker SDEO Mokokchung, Wt. R. Imsüsenla-i GHS Longmisa pur Hon Jubilee nüngtem adokba nüngokaket ka sayatsü.
Tanep tongti tesemdanger I. Satemmenla-i GHS Longmisa küm 50 ajungba tenüng nung school kima temaitsü zülu ka lapokja liasü.
Tanü iba sentong nung GHS Longmisa kaketshir aser taoba mapang zünger aortemi kenten aser jilushi balala ajanga shilem agi. Sentong nung GHS Longmisa Asst. Headmistress Wt. T.Imtikala Jamir-i tarur ajak pela agizükba den Longmisa Village Council Chairman Wb. Yashiemba aser taoba GHS Longmisa nung headmaster tsürabur Wb. P. Lanu Pongen nati Jubilee salem o aser menungra bilemba o balala lemsatep. Sentong nung temoatsü meshia Longmisa Baptist Arogo Pastor Wb. T.Toshi Jamir-i sarasadema tenzük aser Home Evangelist Wb. L.Toshi Lemtur-i sarasadema tembang.