GHS Mangmetong nung sobaliba sentong ka agi

Shisalen sayur Moatemjen  Imchen  (abelen) aser Tekarongsen  Jamir (achiji) nati GHS  Mangmetong nung sobaliba sentong ka nung jembidang tangokba noksa nung angur. Mokokchung, September 29, 2016

Mokokchung, Sep. 29 (TYO): Pei sobaliba aser ayak wazüka ayutsü nükjidong yur Government High School Mangmetong nung ‘sobaliba anogo’ ta sür sentong tajung ka  school kilem nung ayongzüka agiogo.

Iba sentong nung kaketshir aser tesayurtemi shilem balala agiba den shisalen sayurtemi Aor sobaliba dak sentakba onük balala nung ajemdaker tagitsü shisatsü jenti lemsatepa liasü.

Sentong nung shisalen sayur taoba Mangmetong Village Council Chairman, Wb. Tekarongsen Jamiri “Aor Jayajakoyim & Kibalembo” onük nung ajemdaker jembidang, tangar dang akhümtsübu yimya sayutsübaji jayajako shitak benshiba nungi tenzüker, ta ashi.

Ao kin asoshi iba onük ya kanga tongtibang aser ibai Aor sobaliba nung tera yanga lir. Shitak jayajakotepba ajanga nüburtem tsüngda kati ka akhümtsübur aser iba ajanga tali sentaktepdaktsür, ta paisa shisem.

Paisa iba dak sentakba nung ashidang, asen den tainba/tambu/tantsü dang tenüng agi ajabaji majung, anungji, taintem dang nungi shisatsü agir tim jayajako shitak benshitsüla, ta kaketshirtem ayongzük.

Tekarongsenisa kibalembu tsütsü tekümdangtsü olen ka ashidang, Aor sobaliba nung kasa kidong tsüngda kibalembutsübaji khenyongi memelar, anungji, lanurtemi iba nungji kanga kümdangtsüla, ta metetdaktsü.

Ano shisalen sayur Wb. Moatemjen  Imchenia “Sobaliba ken ratet & angazükba mapang” onük nung jembidang, sobaliba ken ajanga kin ka sobaliba, loktiliba, yimsüyimpong aser temaitsü sayur, ta ashi. Paisa tetsür/teburtemi atenba Aor sobaliba kenten menü tapu balala indang rateta ashi.