GHS Sapotimi school ki tasen lapokogo

MLA & Advisor to Chief Minister, Merentoshi R Jamiri GHS Sapotimi pur school ki tasenba lapoktsüdang tangokba noksa nung angur. Mokokchung, September 7, 2016.

Mokokchung, Sep 7 (TYO) : Govt. High School Sapotimi pur school ki tasenba Bodbarnü MLA & Adviser to Chief Minister, Wb. Merentoshi R Jamiri Sapotimi yimtak meraketa lapoktsüogo. Sapotimi ya Zunheboto district kübok yim ka lir aser iba yim ya Mokokchung nungi Longsa ajanga kilometer 30 shi pilar lir.
Tongti tesemdanger Merentoshii iba school ki tasen lapokja jembidang, nüburtemi school ki asüba nung temulung kangabo magütsür aser balaka sorkar school ki-tem reprangdangra teimbaka temeimtsü tia nung lir, ta ashi.
Paisa iba sentakba nung ashidang, nüburtemi tenla kibo tululu süteper, saka school ki asütsübo temulung magütsür. Anungji, school ki aser kaket riju yangerba nung nüburtem shilem tulu lir ta angatettsüla, kechiyong ibai nisung ka taküm aser tarutsü lanurtem tia yangludak lir, ta paisa shisem.
Tesayurtem dang inyakdaktsünüba olen kar ashidang, tesayur kaji textbook nung aliba lesson kisüng sayubaji teperi masü saka iba dang alia tanurtem asoshi tatishitsü süa aliba taküm kaka asütsüla, aser tsürabur aser school tanurtem den tesendaktep junga ayutsüla, ta paisa ajungshia liasü.
Paisa Sapotimi yimeri iba school ki lapoktsü jaokba asoshi pelaba den akhi mapang nungi Longsa yim o Sapotimi aser temeket kishikina Sumi yimtsüngtem den jungtepa aser putepa aruba indang kar shisema liasü.  Aji oda, akhi koda Longsa aser temeket Sumi yim balala nüburtem jungtepa aru, yamaji tarutsü nunga iba kasa tanela mesamai tali tesendaktep akangshitsü asoshi paisa tayongzükba ka agütsü.
Tanü Naga nunger lokti nung telungjem maliba aser pei kin atema dang bilemba agi süngogo, iba ama tensa ka nung, Longsa yim den temeket aliba Sumi aser Sangtam yimtem putepa aliba ya jangratemtsüka aser tangar asoshi tatishitsü ka asütsü, anungji, iba tesendaktep ya maneni akangshia aotsü asoshi paisa ayongzük.
Sapoti village council chairman, Wb. Khekuto Chopi-i tarurtem ajak pelaa agizük aser Longsa village Council Chairman, Wb. I. Meren Pongenia mapang tatsüka agia jembi. GHS, Sapotimi nung azüngertemi ken tajung ka aten aser telok balalai sobaliba ken aser yartsüngsangtem ia sayuba ajanga sentong tali tobur jungdakja liasü.