GHSS Jalukie-i 1buba State Level GHSS Sepaktakraw Tournament kokogo

Kohima, October 19 (TYO): Mezüngbuba State Level GHSS Sepaktakraw Tournament nung Government Higher Secondary School (GHSS) Jalukie-i takok nguogo.
Iba asayamung ya Directorate of School Education ajanga IG Stadium Kohima nung ayongzüka amung aser iba sentong nung Nagaland nung aliba district ajunga nungi shilem agi.
Iba asayamung final nung GHSS Jalukie-i Razhükhrie GHSS Kohima madak takok angu.
Sepaktakraw ya Naga nunger asoshi tetemsü asaya ka lir, ta iba asayamung semzüktsüba sentong nung jembidang tongti tesemdanger aser Director School Education, Wonthungo Tsopoe-i ashi. School Education Department aser Youth Resources & Sports Department ajanga iba asaya tajungba kümdaktsütsü meranger, ta pai shisem.
Classroom nung shisatsü angazükba kisüng ya teperi masü aser tang tetoktepba lima nung nisung ka ji lenmang balala nung sempet alir ka nüngdaker. Iba yongji department-i state nung aliba GHSS ajunga nung Sepaktakraw ya teti asayaba saisapong ka kümdaktsü, ta Director-isa shisem.
Iba sentong nung RMSA Mission Director Limawabang Aier ya totushi tejaoker liasü aser pai iba asayamung nung shilem agirdang palaba metetdaktsü.
Iba asayamung tenzükba sentong ya All Nagaland Physical Education Teachers Association tir, Vitsolie Keyho-i ketdangsüa agi aser PET Mesehol-i sarasadema tenzük. Iba sentong nung tesenteper pela agizükba o ya Additional Director Pollem Tep-i jembi aser Deputy Director T. Lipok Jamir-i tepela o jembi.