GHSS, Jotsoma pur Golden Jubilee among

Kohima, Rongjui/September 07 (TYO): Tanü Government Higher Secondary School, Jotsoma pur küm 50 ajungba Golden Jubilee mongogo, aser iba sentong nung tongti tesemdangerji School Education Advisor, K.T Sukhalu liasü.
Iba sentong nung jembidang K. T. Sukhalu-i GHSS, Jotsoma takok anguba nung shilem agir ajak dang pelaba metetdaktsü. Pai ashiba agi, school upgration süaka infrastructure junga maliba ajanga timtem aika ajurur.
Paisa, loktii shilem agia temelen tesayur inyakdaktsüba timtem, infrastructure terenlok aser tesayurtem bushiba nung yaritsüla, ta ashi.
Sukhalu-i tesayurtem dang pei mapa kanga nendaka inyaktsü ayongzükba den külemi top 10 nung takok anguba sorkar school mashie ka nem pa indang ita ka itasen agutsütsü, ta nangzük.
Kasa sentong nung School Education Director, Wonthungoe Tsopoe-ia iba school nungi lenla balala nung nisung tajung aika adokdaktsüba aser school terenlok atema Arogotemi shilem agiba atema tenüngsang agutsü.
Pai ashiba agi, school education department ya tanur aika indang tsüraburtem amai lir aser junga mereprangteter, ajisüaka GHSS, Jotsoma nung temelenshi aliba aser nüburtemi shilem tajung agiba ajanga UNESCO indang shisaliok teratet ‘külemi aliba’ atalokdaktsür.
Principle Secretary, School Education, Menokhol John-i school dang taoba mapangtem atema nüma atangba dang masü saka tarutsü atema ano tajungba melenshia inyaktsü ayongzük.
Iba school nung mezüngbuba headmaster, D. Peseyie-ia school putiotsü lemsatepba den külemi iba school amenokdang ajangshiba timtem lemsatep.
Sentong nung 8th Western A/C nungi MLA, Keneizhakho Nakhro-i school souvenir sayatsü aser Convenor SMDC, Rev. Savito Nagi-i tetenzük sarasadema agia liasü.
Principal GHSS, Jotsoma Azinu Savi Swuro-i lokti pelaa agizükba o jembi, Headmaster, GHSS, Jotsoma Mezhü-u Hozoyeh -i tepela anküp o jembi aser Baptist Church Jotsoma Pastor, Rev. Zakiebinyü Peseyie-i sarasadema sentong tembanga liasü.