GHSS Phek Sports week tenzükogo

Dimapur, Rongjui/September 19 (TYO): Government Higher Secondary School, Phek annual sports week Rongjui/September 19 nü Phek Local Ground nung tenzükogo. Asayamung lapokba sentong nung Phek Deputy Commissioner aser school mendenbuba, Orenthung Lotha tongti o jembir liasü.
Asayamung lapokba sentong nung o jembidang pai tawa tembangba academic session nung takok tajung angur kaketshirtem tenüng asang. Paisa saisapong ya lenla ajak nung terenlok atema tongtiba ta ashi. Maneni pai, taoba academic year nung tesayurtemi mapa kanga junga inyakba atema parnok tenüng asang aser maneni parnok mapa tajung tezümetangi inyaktsü ajungshi. Asayamung nung shilem agiba house pezü; Belgium house, England house, France house aser Germany house dang asayamung nung shilem tajung agitsü paisa ajungshi.
Sentong nungsa pai asayamung wako salatsü aser asayamung milen tsükloktsü aser iba sülen contingent ajaki march past ia liasü. Asayamung lapokba sentong ya Wangshikokla lenisüba kübok aka aser Vice Principal, GHSS, Phek-i lokti pelaa agizükba o jembi. Asayamung nung shilem agitsüpurtem tenangzüktepba, Neihite Akami-i achaayanga agi, ta ketdangser sangdong ka ajanga metetdaktsü.