Gianni Infantino-i 2026 World Cup linük kar lokteper ayongtsü ajungshir

Madrid, February 17 (Agencies) : 2026 Football World Cup asayamung linük pezü lokteper ayonga amung nung ajungtsü, ta Brihostibarnü FIFA Tir, Gianni Infantino-i ashi.
Pai, iba asayamung lokteper ayongnertemi application agütsüba onoki agizüktsü, ta shisem.
“Onoki World Cup asayamung linük kar lokteper ayongtsü ajungmesoba ya kechiba süra asenoki FIFA dang asenok tebilemba tajung nung inyakba sayutsüla aser tarutsü mapang talangka asoshi bilema inyaktsü nüngdaker,” ta Infantino-i ashi.
“Asenoki linük ana, asem mesüra pezü külemi lokteper linük shia nung aliba stadium asem, pezü mesüra pungu lemsatepa iba asayamung mungtettsü. Asenoki iba mapa ya ajungshitsüla. Yamaji inyakba ajanga linüktem tsüngda tesendaktep tajungba akümtsü,” ta pai ashi.
Pai ashiba o ya United States, Canada aser Mexico atema kanga ajungtsü, aser item linük asemia yamaji inyaktsü asoshi lemteptsü bilemdar, ta tamalen shiogo.
Yaküm küm tatemlen Concacaf federation nung Tir, Victor Montagliani-i, iba dak sendakba temzüng ozüngtem metetdaktsüba sülen inyaka aotsü mapatem atema jembitsü, ta ashi.
FIFA-i lokteper ayongba asayamungji 2002 küm Japan aser South Korea na senteper ayonga asayaba to mezüng aser tatembang liasü. Iba asayamung nisung ajaki kanga takok ngua tembangogo, ta ashi.
Sweden FA nung mendenbuba Karl-Erik Nilsson-i iba tebilemba junger, ta karakara metetdaktsüogo.
Pai, “World Cup asayamung linük kar lokteper ayongtsü ashibaji bilemtetba tajung lir. Europe nung tesüiba mapang European Championships asayamung iba yimya nung asaya liasü,” ta ashi.
“Onokbo iba yimyaji sübaa lir aser iba inyakyim ya kanga junger. Iba inyakyim ajanga linük aikati asayamung ayongba nung shilem agiteter koba ajak asoshi tajung,” ta paisa ashi.