GITI-i World Youth Skills Day among

Dimapur, July 16 (TYO) : Kohima Government Industrial Training Institute (GITI)-i July 15, 2016 nü Government ITI Kohima nung World Youth Skills Day mongogo.
Iba sentong nung mendenji Government ITI Kohima nung Principal, Er. K. Wati-i liasü aser Directorate of Industries & Commerce nung Deputy Director, Er. Lipongse Thongtsar-i o jembi.
Er. Lipongse Thongtsar-i, India nung mapa inyaker ajak rongnungi noklang nung shilem 10 ang mapa ashirtem lir aser item rongnungia shilem 2 dang training agir mapa ashirtem lir. Tanüngba shilem 8 ji pei sasa angazükbatem lir. Tashi temeteter limatem- Korea & Japan nungbo noklang nung shilem 80 nungi 90 tashi ‘skilled worker’ tem lir, ta paisa ashi.
Lipongse-isa, nisung kaji kaketshisatsü angazükba den külemi tanga mapa nunga mongin küma shitakba tangazüka angutsü nüngdak. Oset ka koma yanglutsü ibaji metetba kijaji teperi masü saka pei-i angazükbaji ajanga mapang aser rongsen kümzüka oset tajungtiba yanglutsü merangtsüla, ta shisem.
Renloker aliba linüktem nungbo mapa inyaker noklang nung shilem 10 ang sorkar mapa inyakertem lir aser tanüngba shilem 90 ji pei sasa inyaktetba mesüra nija company kar nung inyaka taküm alitem lir. Asenok shisatsü aser tebilemba khen melenshitsü nüngdaka lir kechiba süra mapa atema kodang jembidir asenoki sorkar mapa ang asütsü amai bilemer, ta pai ashi.
Pai, tang ama kanga kara melenshiba aser pi den toktepba tensa ka nung asenok peria aser jangratema alitsü atema bendanga agüja inyaktsüla, ta tesentepertem ayongzüka pa o atem.