Glastonbury nung Foo Fighters puri shilem agitsü

February 26, 2017 (Agencies): Taküm ‘Glastonbury’ benjong nung Foo Fighters teloki shilem agitsü jangjaogo. Küm ana tejakdang par telok nung kentener Dave Grohl tetsüng raksaba sülen parnok iba benjong nung shilem magitet.
Iba benjong nung Honibar aonung parnoki tongti shilem agitsü. Maneni Radiohead-i Hokolbar aonung tongti shilem agitsü, saka Deobar aonung tongti shilem asoshi tang tashi mesangdongi lir.
Iba osang Hokolbar aonung Frome, Somerset, Cheese and Grain pub nung miim kentenba sentong ka akadang, Glastonbury benjongmung ayongzüker Michael Eavis aser Emily Eavis na dena lia sangdong.
“Foo Fighters puri Honibar aonung taküm iba benjong nung tongti shilem agitsü nangzükbaji onok asoshi kanga tia tajung ta züngshir. 2015 küm parnok iba sentong nung shilem magitetdang kanga mepelai liasü, saka taküm parnoki shisadanger molungsoa nangzükba atema mamangteti bilemer,” ta Emily Eavis-i ashi.
Foo Fighters puri hopta piyong parnok sapurtem mesüshia arudar, koba nung pyramid symbol keter Obelisk Airlines atema boarding card tem lemshiba aser parnok website nung countdown adokba tem lir.
“Somerset local kentenba sentong nung alima nung nüngtugu kentener telok ka arua shilem agitettsüsa onoki achaayangtetba atema kanga pelar. Cheese and Grain ya taa kecha magiba tesem ka lir aser iba kibur ka asütsü asoshi ni kanga nümadanga belimer. Kentener teloktemi miim kentenba sentong ka akatsü asoshi asüngdang dang mezüng onoki iba tesem nung sentong akatsü shidanga liasü, aser tangbo iba tesem parnok ajanga meteta kümogo,” ta Eavis-i shisem.
Deobar aonung tongti shilem agitsü asoshi tang tashi mesangdongi lir, saka iba shilem Ed Sheeran-i agitsü akok.
2017 Glastonbury benjongmung ‘Worthy Farm’ nung June 21 nungi 25 tashi amungtsü.